Gobierno di Aruba, hunto cu FCCA, a tene un momento cu prensa diamars mainta na Caya Butishi, Mabon, pa comparti e progreso di e proyecto di renobacion di un edificio den e area.
Jessica van Montfoort-Posner di FCCA a expresa su satisfaccion cu e renobacion aki, unda trabounan grandi di mantencion di diesdos cas den e edificio ta completa oficialmente.
Director Tecnico y Comercial di FCCA, Sra. Julie Wever, a amplia riba e importancia di e proyecto y su impacto riba comunidad. Sra. Wever a expresa su orguyo cu e renobacion na Mabon ta representa un paso importante den un trayecto mas amplio pa mehora comunidadnan di bario pa bario. El a felicita Mabon pa e logro aki y a confirma cu trabaonan lo continua, incluyendo renobacion di mas cas y cura.
Den cuadro di e evento, residentenan tambe a comparti nan experencia personal:
Louisa Ann Bradway, kende a biba den e edificio pa mas cu 22 aña, a describi Mabon como un bendicion y a expresa su gratitud profundo na Dios. El a comparti su aprecio sincero na FCCA y Gobierno di Aruba pa e trabou cu nan ta haciendo, no solamente na Mabon pero henter Aruba, enfatisando cu e tipo di esfuerso aki ta haci un diferencia real pa pueblo. Louisa tambe a gradici Prome Minister Mike Eman pa su sosten continuo.
Jelitza Croes, kende ta biba den e edificio pa mas di 20 aña, a comparti cu e ta orguyoso y contento di por biba na Mabon. El a describi e ambiente di e bario como amabel y humilde, y a indica cu e renobacion a trece un cambio positivo importante. Anteriormente, e edificio tabata neglisha, pero awor, danki na e renobacion, e ta presenta un apariencia mas bunita, cu colornan alegre y un ambiente mas agradabel pa tur habitante.
Durante e conferencia di prensa, Prome Minister Mike Eman a expresa su gratitud profundo pa e presencia di habitantenan y comunidad di Mabon.
Eman a enfatisa cu cada biaha cu Gobierno drenta un bario, nan ta mira e necesidadnan real di e comunidad y ta sinti e reto cu ciudadanonan ta confronta den nan bida diario. Segun Eman, esaki ta reenforsa e responsabilidad di Gobierno pa actua y busca solucionnan concreto pa mehora calidad di bida.
Prome Minister a subraya cu Gobierno y FCCA ta trahando hunto pa analisa e necesidadnan di cada bario y traduci nan den plannan concreto. E meta ta cla: duna cada ciudadano un hogar digno y un ambiente di bida mas humano y sostenibel.
Eman a celebra e hecho cu diesdos famia na Mabon a ricibi nan casnan completamente renoba, describiendo esaki como un ehempel di e impacto positivo cu por logra ora Gobierno, comunidad y partnernan traha hunto.
Segun e Prome Minister, coordinacion entre Gobierno y FCCA ta esencial pa yega na cambio real den barionan. El a gradici Sra. Julie Wever y e team di FCCA pa nan compromiso y colaboracion continuo.
Eman a recorda cu mas cu un aña pasa el a bishita Mabon y a nota e estado deteriora di e edificio. Den colaboracion cu FCCA, a logra un proceso di limpiesa, renobacion y transformacion cu awe a resulta den un edificio completamente renoba y entrega na comunidad.
Prome Minister a haci un apelacion na ciudadanonan pa cuida nan medio ambiente y uza infrastructura publico na un manera responsabel, incluyendo maneho di desperdicio y mantencion di limpiesa den bario.
Ademas, Eman a menciona cu Gobierno ta sigui cu proyectonan di renobacion y desaroyo den otro barionan manera De Vuyst, Bushiri y Village, unda infrastructura y casnan lo wordo mehora gradualmente. Den Village specificamente, mas o menos 141 cas lo wordo renoba despues di un periodo largo di espera.
Eman a recorda cu algun aña pasa, Gobierno a yega na un acuerdo importante cu FCCA riba maneho di debe y subsidio pa vivienda, unda e compromiso financiero a wordo structura pa mantene vivienda accesibel pa ciudadanonan.
Segun e Prome Minister, e tipo di acuerdonan aki ta mustra cu ora Gobierno y partnernan haci un esfuerso conhunto, e resultado ta visibel y positivo pa comunidad.
“Progreso no ta bin su so, pero ta resultado di trabou duro, compromiso y decisionnan cu ta enfoca riba bienestar di pueblo,” segun Eman.
