E Gobernador di e estado di New Jersey, Mikie Sherrill, a anuncia oficialmente e diamars cu e seleccion nacional di Maroco, hunto cu tres otro ekipo mas, a scoge e estado cu lo fungi como sede di e gran final mundialista pa establece nan base di operacion.
Sherrill a expresa su entusiasmo den un comunicado comparti cu e embahador di Maroco na Merca, Youssef Amrani, resaltando e papel clave cu New Jersey lo hunga durante e Copa di Mundo.
Cuater seleccion lo establece nan campamento base
New Jersey no solamente lo ricibi Maroco, sino tambe tres otro seleccion di renombre cu a confirma nan estancia den e estado:
- Maroco: E seleccion cu a sorprende mundo cu e di cuater luga na Qatar 2022, lo concentra na e Pingry College, situa na Basking Ridge (west di e estado).
- Brasil: E unico pentacampeon mundial lo establece su base n’e Columbia Park Training Center, e ciudad deportivo di New York Red Bulls na Morristown.
- Senegal: E gigante Africano lo hospeda na e Universidad di Rutgers na Piscataway.
- Haiti: Segun informacion di The Athletic, e seleccion Haitiano lo instala su mes na e Universidad di Stockton (Galloway), den e parti zuidoost di e estado.
Preparacion y partidonan clave
Como parti di su preparacion final, e seleccion Noord Africano lo hunga un partido amistoso contra e seleccion di Noruega, lidera pa Erling Haaland, dia 7 di juni proximo. E encuentro aki lo tuma luga na e Sports Illustrated Stadium, apenas 30 minuut leu di e MetLife Stadium, caminda lo hunga e gran final dia 19 di juli.
Accion den e sede New York/New Jersey
E seleccionnan menciona lo tin un agenda ocupa den e area:
- Brasil y Maroco lo protagonisa e prome partido oficial den e sede di New York/New Jersey dia 13 di juni.
- Senegal lo hunga dos partido di e fase di grupo den e MetLife Stadium.
E anuncio aki ta reafirma New Jersey como un punto central pa e fanaticada y e ekipo nan cu ta cla pa e cita maximo di futbol global.
