E tension geopolitico ta drenta tereno di wega. Mehdi Taj, presidente di e Federacion di Futbol di Irán (FFI), a declara cu e participacion di su seleccion den e Copa Mundial di 2026 ta depende di “garantianan concreto” cu FIFA mester duna. Segun e dirigente, mester sigura cu no lo tin “insulto” contra e institucionnan oficial y militar di Irán durante nan estadia na Merca.
Condicion pa bishita suelo Americano
E lider di futbol iraní a enfatisa cu e presencia di su pais den e torneo ta mara na un reunion cu e presidente di FIFA, Gianni Infantino, cual lo por tuma luga pronto na Zúrich. Taj a reclama un “respeto absoluto” pa e delegacion Iraní y a adverti riba e consecuencianan si esaki no wordo cumpli.
“Nos no lo tin problema pa asisti si no presenta ningun tipo di insulto, specialmente contra e institucionnan oficial y militar di nos pais,” Taj a afirma, haciendo referencia implicitamente na e Guardia Revolucionario, cual Merca ta considera un organisacion terorista.
E advertencia ta bay mas leu: Taj a menciona cu, si e delegacion sinti nan mes insulta, nan lo duna un “contesta proporcional” y hasta tin e posibilidad cu e seleccion lo bandona e competencia pa regresa nan pais.
Antecedente na Canada
Taj, kende tabata miembro di e Guardia Revolucionario, a uza su experiencia reciente na Canada como ehempel. El a relata cu durante su biaha pa e di 76 Congreso di FIFA na Toronto, el a dicidi di regresa Irán despues di a sufri “insulto” na inmigracion. No obstante, medionan Canades a reporta cu e realidad tabata cu el a wordo deporta debi na su pasado militar.
E postura di FIFA y Merca
A pesar di e tensionnan, Gianni Infantino a reitera su optimismo:
- Union global: Infantino a confirma cu “Irán lo hunga na Merca”, argumentando cu e meta di FIFA ta pa uni mundo y keda positivo.
- Conflicto diplomático: Irán y Merca tecnicamente ta den un estado di guera desde februari, maske actualmente tin un tregua vigente.
Por ultimo, e Secretario di Estado di Merca, Marco Rubio, a aclaria e posicion di Washington: e hungadonan lo ricibi permiso pa drenta y hunga nan partidonan na Santa Clara y Seattle, pero e entrada lo keda prohibi pa e personal tecnico di e federacion cu tin lasonan confirma cu e Guardia Revolucionario.
Irán, cu a clasifica como lider di Grupo A den e zona Asiatico, ta cuadra den Grupo G hunto cu New Zealand, Bélgica y Egipto.
