Bou di e lema potente di International Council of Nurses (ICN) pa e aña aki, e Organisacion di Enfermeronan di Aruba (ODEA) ta extende un caluroso felicitacion na tur e profesionalnan di cuido riba nos isla. E aña aki, e enfoke mundial ta riba e balor economico di enfermeria y e necesidad urgente pa empodera e forsa laboral aki pa garantisa un sistema di salud resiliente.
Empoderamento y e reto di AruBIG
Pa e impactonan di enfermeria sea mas grandi, e profesionalnan mester ta debidamente empodera. Esaki no ta encera solamente participa den e decisionnan di cuido diario, sino tambe den e decisionnan strategico di salubridad publico na Aruba.
Un punto cardinal pa ODEA ta e introduccion di AruBIG. Maske e proceso pa registra ta accesibel pa esnan cu diploma di MBO-4, HBO-V, Nurse Practitioner of Verpleegkundig Specialist, e reto real ta den e re-registracion. ODEA ta haci un yamada pa:
- Creacion di un Plan Nacional di Educacion pa garantisa cu tur nurse tin e posibilidad local di mantene nan nivel di experticio (deskundigheidsbevordering).
- Sigura cu e nursenan por cumpli cu e exigencianan legal pa keda registra den AruBIG sin obstaculo.
Proteccion di e Titulo: Un Garantia pa Aruba
Introduccion di e registro aki ta di sumo importancia pa e ciudadano. E titulo di enfermero, enfermera, verpleegkundige of nurse ta un titulo protehi. Esaki ta nifica cu solamente esnan cu un diploma reconoci y e capacidad debi por carga e nomber aki. ODEA ta subraya cu mester sigura cu no solamente den instituto, sino tambe pafo di nan, tur cu ta duna cuido tin nan credencialnan den regla.
Un Llamado na e Futuro Generacion
Aruba, mescos cu henter mundo, ta enfrenta un escasez critico di nurse den hospitalnan, cas di cuido, cuido na cas y educacion. Den cuadro di esaki, ODEA ta stimula:
- Studiantenan actual: Busca un “buddy” den e profesion; un nurse cu experiencia cu por guia y motiva boso pa termina boso estudio cu exito.
- Hoben y Adulto: Si bo ta sinti e yamada di “roeping” y amor pa cuida bo prohimo, inscribi bo mes na Colegio EPI of Xavier University. Nunca ta laat pa inverti den bo mes y bira e futuro profesional cu Aruba mester.
Reconocimento y Teamwork
E siman aki ta un oportunidad pa pone e luz riba e enfermeronan, verzorgenden y verpleegkundigen. Sinembargo, un nurse no por funciona sin su stakeholders. ODEA ta balora e teamwork di tur profesional den salubridad, pero ta pidi comunidad y comercio pa e siman aki, pone e nurse den centro di aprecio.
Pabien na tur Nurse di Aruba! Ban demostra nos aprecio na e personanan cu t’ey pa nos ora un kiebante di salud bati na nos porta. Boso amor y sacrificio ta e fundeshi di nos bienestar.
