MetLife Stadium, cu lo fungi como sede pa e gran final di Copa Mundial,, a inicia su proceso di adaptacion. Esaki ta inclui instalacion di un yerba special caminda lo hunga ocho partido, incluyendo e final riba 19 di juli.
David Graham, hefe di terenonan di wega di FIFA, a splica cu e yerba selecciona ta di e tipo “Bermuda”, ideal pa temponan calor. E yerba aki a wordo transporta for di North Carolina despues di a pasa den pruebanan cientifico na e Universidadnan di Tennessee y Michigan State pa garantisa su adaptacion na e clima local.
Experiencia y cambio
E decision pa uza e tipo di yerba aki ta bin despues di critica fuerte ricibi durante e Mundial di Clubes di aña pasa, caminda hungado y entrenadornan no tabata satisfecho cu e estado di e canchanan. Segun representantenan di FIFA, e biaha aki e sedenan tin mas di un luna pa prepara e tereno, a diferencia di e cinco dianan cu nan tabatin anteriormente.
Kalender di wega
E stadion, cu lo wordo yama oficialmente “Nueva York/Nueva Jersey Stadium” durante e torneo pa motibonan comercial, lo acoge e siguiente partidonan:
- 13 di juni: Brasil contra Maroco
- 16 di juni: Francia contra Senegal
- 22 di juni: Noruega contra Senegal
- 25 di juni: Ecuador contra Alemania
- 27 di juni: Panama contra Inglatera
- Ademas di un partido di 16 final, un di 8 final y e gran final di 19 di juli.
Mas cu futbol
Cu un capacidad pa 82.500 fanatico, MetLife no solamente ta e cas di e ekiponan di NFL, New York Giants y New York Jets, sino tambe un epicentro pa concierto. Despues di e Mundial, e stadion lo ricibi artistanan grandi manera BTS, Guns N’ Roses, Bruno Mars, Ed Sheeran, Karol G y AC/DC durante e resto di e zomer.
