Durante e ultimo reunion publico den Parlamento, a surgi un situacion remarcabel unda e propio Fraccion di AVP a dal nan Minister di Infrastructura un “sota” formal. Pa medio di un mocion cu a wordo aproba unanimamente, e fraccion berde a confirma loke Pueblo y Fraccion di MEP tabata bini ta bisa: e Minister ta papia hopi, pero no tin ni un bista cla, ni proyectonan concreto pa Aruba.
Un “Brevet van Onvermogen” den man di e propio fraccion
E mocion number 2 di e Fraccion di AVP ta papia pa su mes. Den un acto incomprendibel (of pa falta di experiencia), e parlamentarionan di AVP a skirbi den nan mesun mocion cu e presupuesto di DOW “no ta contene un bista cla y completo di proyectonan concreto pa aña 2026.” Esaki no ta un critica di oposicion, esaki ta un confirmacion oficial di e mesun partidonan cu ta sostene e Minister.
403 dia: Cero caminda, Cero contesta
E realidad ta bisto, y e mocion aki ta djis legalisa e falta di maneho. Despues di mas di 400 dia den gobernacion, e resultadonan ta keda na cero:
- Cero caminda asfalta.
- Cero transparencia den con ta gasta placa di pueblo.
- Cero plan concreto pa nos infrastructura.
E Minister a presenta un presupuesto bashi, sin substancia, strobando Parlamento di por eherce su trabou di control. E mocion ta bay asina leu di bisa cu mester tin un conexion visibel entre gasto y proyecto, loke ta nifica cu actualmente, e Minister ta pidiendo placa sin por bisa exactamente kico e ta bay haci cun’e.
Ultimatum di 30 dia
E Fraccion di MEP a vota na fabor di e mocion aki pasobra nos ta di acuerdo: e Minister mester bay Cocolishi, haci su trabou di nobo y stop di gaña Pueblo cu bunita palabra. El a haya un ultimatum di 30 dia pa presenta e bista specifico cu e mesun fraccion di AVP a nota cu ta falta.
“Pueblo merece transparencia, seriedad y camindanan drecha y sigur, no solamente promesa den aire y mocionnan cu ta confirma incapacidad di un maneho bashi. Aruba mester keda goberna na drechi!” – Parlamentario Tromp-Lee
