No, ta pa cada cos cu sososde , pa cada discucion, hende mester keda wanta otro na curason,
Hopi biaha por sosode cu e cara ta smile, pero e curason tin cos aden, e mente ta warda oportunidad pa vengansa, y e boca ta cla pa tira pasado den cara di otro, e cosnan ey aunke carnalmente hende ta kere den nan, fisicamente y spiritual nan ta haci hopi danjo.
Teniendo hende na curason , ta crea un relacion di falsedad y hipocrecia, caminda nos ta papia y hari cu otro, mientras cu nos curason ta desea otro cos, nos ta fake, nos no ta real manera Dios kier pa nos ta, nos ta trata otro cu dos cara, mientras cu por ehempel dilanti di hende nos ta bon pero na cas, nos no ta bon.
Ta manera hende cu ta discuti mainta, bay traha henter dia, y bolbe atardi sigi cu mesun discucion di mainta, hende cu ta bay iglesia, tende e palabra di Dios, y toch sali bek cu e mesun opinion rebelde y papia mesun cosnan di bobedad, demostrando manera ami ta sigi haci locual cu mi kier, y cu locual ma tende no a papia cu mi bida.
Tene bon cuenta cu e enemigo ta herida bo, pero ta e palabra di Dios ta cura bo, no tin remidi farmaceutico pa cura rabia y duele, ta solamente ora bo pordona, y Dios sana bo curason bo ta libera di rabia y duele.
Duele ta asina peligroso cu e por pone hende perde interes den nan bida, especialmente ora bo duele pone bo cay bao di dominio di hende, pero ehempel pasobra e persona a haci tal cos cu bo, pesey bo no ta interesa, na traha, ni biba drechi mas, of pasobra of relacion a wordo kibra, ya bo no kier tende ni mira mas, y bo a perde interes den bida, hopi biaha e cosnan ey ta hiba na adiccion, alcoholismo y por ultimo hasta suicidio.
Y e palabra di Dios ta bisa nos lo siguiente; Un curason contento ta un bon remedi,ma un spiritu abati ta seca weso. ( Proverbionan 17:22),
Tuma bon ehempel di esaki y wak bon ora nos ta papia cu otro, pa nos no ta rebaha,insulta, y maltrata otro verbalmente especialmente ora ta trata di mucha , esposa/ esposo of den un palabra bisa tur hende mes wak bon con nan ta papia cu otro, pa no lanta duele y rabia den curason di otro. ( Efesionan 4:29).
Nunca sinti bo mes den un posicion cu bo ta kere, cu bo por bisa un hende of ofende un hende na bo antoho, y e persona tin cu acepta, pasobra tin biaha hende ta keda keto pero nan curason ta kibra, pasobra nan ta pensa con bo por haci algo asina cu nan , mientras cu nan si ta stima y respeta bo,
Un curason trankil, ta bida pa e curpa , ma envidia ta putrimento di weso,( Proverbionan 14:30).
No laga envidia , pone bo haci redo, papia malo di hende, pasobra ta bo mes bo ta haci danjo.
Pasobra rabia ta mata hende bobo, y envidia ta mata hende simpel.( Job 5:2).
Ora rabia y envidia combina, hende por haci cosnan of papia cosnan cu nan mes no por controla, y asina ta haci danjo na nan mes y na otronan.
Pesey semper controla bo hogar, bo famia, y bo matrimonio, pa rabia , envidia, y falta di oordon, no ta scondi y asina stroba e presencia di Dios den bo hogar.
Mantene boso curason firme y limpi.
Sinceramente, Pastor Marcel Balootje
