Arubaanse Voetbal Bond (AVB) ta anuncia cu e momento a yega pa e gran final den e categoria LIFIDA-A (U-11) Categoria Plata. Despues di un temporada intenso, e ekiponan di S.V. Caiquetio y S.V. Bubali a logra avansa pa disputa e titulo maximo y determina ken lo corona como campeon di e categoria menciona.
E partido aki lo tuma lugar e diadomingo aki, 10 di mei 2026, pa 8:30 di mainta riba e tereno di Centro Deportivo Guillermo Prospero Trinidad (CDGT) na Dakota. E wega lo wordo hunga na e banda links di e tereno.
Detaye di e encuentro:
- Dia: Diadomingo, 10 di mei 2026
- Ora: 8:30 AM (Porta ta habri 1 ora prome)
- Lugar: CDGT, Dakota (Banda Links)
- Wega: S.V. Caiquetio vs S.V. Bubali
AVB a informa cu e ceremonia di inicio lo ta uno special, unda e hungadonan lo sali riba tereno compaña pa e Himno di FIFA, sigui pa nos Himno di Aruba. Pa garantisa un bon fluho di e evento, a pidi e entrenadornan pa realisa e calentamento trempan pa asina cuminsa exactamente na e ora stipula.
En cuanto e reglamentonan di e final, si na final di e tempo reglamentario e score keda empata, lo pasa mesora pa e tanda di tironan penal (5 pa cada ekipo). Si ainda no tin un ganador, lo sigui cu e ehecucion te ora cu un ekipo sali victorioso.
Pa e fanaticada cu kier bin apoya nan ekipo, e cashier di AVB lo ta ubica na e tribuna parti pariba (e parti sin dak). Directiva di AVB ta desea tur dos organisacion hopi exito den e final aki, unda lo otorga 25 medaya y un copa na e campeon y sub-campeon. Un fotografo oficial di AVB lo t’ey presente pa capta e mihor momentonan di e partido y e ceremonia di premacion.
