E evento di boluntario mas grandi na Aruba, ARUBA DOET, lo tuma luga e aña aki riba 15 y 16 di mei 2026. E evento anual aki ta invita tur hende na Aruba pa contribui door di participa den diferente proyecto cu ta sostene y mehora comunidad y e diferente organisacionnan.
E aña aki, e apertura oficial di ARUBA DOET lo tuma luga den bario di Seroe Patrishi, unda un grupo di studiante di di dos aña di Universidad di Aruba ta organisa un proyecto special den colaboracion cu FCCA.
E apertura aki lo enfoca riba e tema central ‘colaboracion’, reflehando e bunita cooperacion entre Universidad di Aruba, FCCA y CEDE ARUBA. Pa medio di ARUBA DOET, cu ta un iniciativa di Oranje Fonds y ehecuta pa CEDE ARUBA, hopi colaboracion valioso ta sosode. E proyectonan di ARUBA DOET cu ta wordo organisa tur aña pa e studiantenan den e diferente barionan di FCCA, ta un ehempel excelente di esaki.
Durante e apertura, lo conta cu presencia di e siguiente invitadonan special cu lo presenta un discurso cortico:
• Su Excelencia Alfonso Boekhoudt, Gobernador di Aruba;
• Sr. Daniel Tecklenborg, director di CEDE ARUBA;
• Sra. Julie Wever, directeur Technisch en Commerciële zaken di FCCA;
• Sra. Mieke de Droog, decaan di Faculty of Arts & Science di Universidad di Aruba.
E proyecto “Hunto pa Seroe Patrishi,” tin como meta mehora area di recreacion y involucra hubentud y residente di e comunidad. Durante dos dia, e boluntarionan lo participa den actividadnan manera haci limpiesa, prepara superficie y pintura di cancha di futbol, basketball y e area rond. Un parti importante di e proyecto ta e pintamento di e logo diseña pa un hoben di e bario. Esaki ta pa fortalece e sentimiento di identidad y orguyo den e bario.
E proyecto ta conta cu apoyo di boluntario di The St. Regis Aruba Resort den colaboracion cu The Ritz-Carlton Aruba y tambe otro boluntario. Na mes momento, ta anima residente pa participa durante e dianan di ehecucion di e proyecto.
Yamada na comunidad
ARUBA DOET ta subraya e importancia di traha hunto pa fortalece nos comunidad y e impacto positivo cu boluntarismo tin riba nos isla.
E diabierna y diasabra venidero, lo tin un total di 135 proyecto tumando luga rond di henter e isla, for di Noord te cu San Nicolas, na diferente fundacion, scol, scouting y clubnan deportivo. Actualmente, no tur proyecto tin suficiente boluntario ainda pa sigura cu cada iniciativa ta un exito rotundo. P’esey ta haci un yamada special na e pueblo di Aruba pa duna un man. Tur hende ta bon bini pa participa y haci un diferencia durante ARUBA DOET.
Por inscribi ainda via e website oficial: www.arubadoet.com.
Ban DOET!
