Pa Dios nada ta imposibel, locual ta imposibel pa hende ta posibel pa Dios, Dios nunca ta laga hende bandona, Dios su misericordia ta grandi y tur dia e ta demostra esey di nobo pa nos.
Si bo ta kere den Dios, mantene fe den Dios, pasobra na e momento cu bo tin mas necesidad Dios ta presenta y ta yuda, no decurasha, un biaha mas no descurasha, pero para firme y mira e grandesa di Dios den bo bida.
Semper segura bo mes cu locual bo ta pidi ta den boluntad di Dios, y pidi Dios, pasobra e palabra di Dios ta bisa den Mateo 7:7 : Pidi y lo wordo duna na boso,busca, y boso lo hanja, bati y lo wordo habri pa boso. Pasobra ken cu pidi ta ricibi, y esun cu busca ta hanja,y pa esun cu bati lo wordo habri.
Dios no ta cambia, tampoco ta bira moderno locual E a pone den su palabra, ta keda existi pa semper pasobra Su palabra no ta cambia.
Hende por bira egoista, orguyoso, rebelde y ta murmura cu un curason yena cu duda, pero Dios ta keda mesun cos, pesey E ta bisa den Su palabra , cu ken cu pidi ta ricibi.
Eynan nos ta mira cu bendicion , sanacion y liberacion di Dios, no ta mara na hende, pero na Dios su misericordia y su compasion.
Lanta ariba y haci oracion, pasobra Dios no ta wak color y cabey, ni tampoco nacionalidad, pero Dios ta wak nos curason y nos fe y nos sinceridad cual nos ta pidi cune.
Mescos cu un yiu tin derechi serca su Tata, asina nos tur tin derechi serca Dios, ora nos ta den Su boluntad.Pasobra e boluntad di Dios lo prevalece riba tur cos.
Marco 11:24 ta para scirbi,Pesey mi ta bisa boso, tur loke boso pidi ora boso ta haci oracion, kere cu boso ta ricibi, y e lo bira di boso.
Mateo 21:22 ta para scirbi: Y tur loke boso pidi den oracion, cu fe boso lo ricibi.
Jeremias 32:17 ta para scirbi: Ay Senjor Dios, Mira ta Abo a traha e cielo y tera pa medio di bo gran poder, Y pa medio di bo brasa extendi! Nada ta mucho dificil pa Bo.
Jeremias 32:26-27 ta para scirbi: E ora ey palabra di Senjor a yega na Jeremias, bisando: Mira , Ami ta e Dios riba tur carni: Acaso tin algo cu ta muchu dificil pa Mi.
No ta pornada e palabra di Dios ta bisa den 2 Timoteo 3:1-5 cu den e ultimo dianan tempo trabahoso lo bini,y tur e splicacion con hende lo cambia, con rebelde , hende lo bira, y con hende lo kier biba dos bida, y purba di haci manera nan ta cu Dios, pero nan curason ta leu for di Dios.
Cristo Hesus ta laga den Juan 14:13-14 palabra convincente den cual hende no por duda bisando: Y tur loke boso pidi den Mi nomber, Esey lo Mi haci . Pa e Tata wordo glorifica den e Yiu.
Si boso pidi algo den mi nomber lo Mi hacie.
Y esaki ta e confiansa cu nos tin Su dilanti, cu si nos pidi cualkier cos conforme Su boluntad, E ta tende nos.( 1 Juan 5:14).
Pesey laga nos aserca e trono di gracia cu confiansa, pa nos ricibi misericordia,y hanja gracia pa yuda den tempo di necesidad.( Hebreonan 4:16).
Serca hende esaki ta imposibel, ma serca Dios tur cos ta posibel.(Mateo 19:26).
Tur cos ta posibel pa esun cu ta kere.
Confia den Senjor, y sigi haci bon.
Sinceramente, Pastor Marcel Balootje
