Parlamentario Stephany Sevinger ta logra aprobacion di dos mocion pa parkeo, beach y infrastructura publico

Miembro di Parlamento pa AVP, Stephany Sevinger, a presenta y logra aprobacion di dos mocion importante durante tratamento di Presupuesto DOW 2026, cu ta enfoca riba mehoracion di infrastructura, parkeo, mantencion di beach y calidad di bida di residentenan.

Den su intervencion, Sevinger a expresa cu durante e debate parlamentario a scucha hopi critica for di oposicion, pero a enfatisa cu critica tin balor solamente ora ta compaña pa solucion y accion concreto.

“Awe nos a tende hopi critica, pero hopi di esunnan cu awor ta critica tabata mesun hende cu tabatin responsabilidad di gobierno durante añanan mientras infrastructura di Aruba tabata deteriora y comunidadnan tabata ignora,” Sevinger a declara.

Parlamentario a señala cu despues di añanan di negligencia infrastructural, gobierno actual AVP-FUTURO finalmente ta presenta paso concreto pa atende cu problema acumula den diferente sector.

Un di e mocionnan presenta pa Sevinger ta enfoca riba e falta creciente di parkeo, particularmente den area turisticonan unda trafico y falta di facilidad adecua ta crea situacionnan peligroso y molester tanto pa residente como turista.

Segun Sevinger, hopi trahado den sector turistico ta obliga pa para cant’i caminda sin iluminacion, zebrapad of facilidad basico di siguridad, mientras na algun beach vehiculonan ta yega te riba santo mes.

“E problema aki a yega na un punto unda siguridad vial y calidad di bida ta afecta seriamente. Nos mester move for di solucionnan temporal pa un enfoke structural y sostenibel,” parlamentario a enfatisa.

E mocion aproba ta urgi gobierno pa desaroya tanto solucionnan inmediato como un plan duradero pa crea mas facilidad di parkeo y organiza miho mobilidad den area di hopi actividad turistico.

E segundo mocion aproba ta enfoca riba mantencion, rehabilitacion y maneho structural di beachnan y espacio publico recreativo. Sevinger a enfatisa cu durante hopi tempo comunidadnan local a expresa preocupacion creciente tocante deterioracion, falta di mantencion y acceso limita na diferente beach.

“Nos beachnan no ta solamente atractivo turistico; nan ta espacio recreativo esencial pa nos propio comunidad. Pueblo merece beachnan limpi, sigur y accesibel,” Sevinger a declara.

Den e mocion, Parlamento ta urgi gobierno pa desaroya un plan integral pa proteha y rehabilita beachnan, cu enfoke riba balansa entre turismo, medio ambiente y bienestar di residentenan. Tambe a pidi pa investiga posibilidad pa mehora cierto area di costa pa recreacion y landamento, semper respetando norma ambiental y proteccion di ecosistema marino.

Parlamentario Sevinger a expresa satisfaccion cu mayoria parlamentario a reconoce importancia di e mocionnan y a brinda nan respaldo.

Pa conclui, Sevinger a expresa cu Parlamento lo sigui monitor cumplimento di e compromisonan asumi. “Pueblo kier mira accion y resultado concreto. Nos lo sigui controla pa garantisa cu e necesidad di comunidad finalmente ta bira prioridad,” Sevinger a conclui.