Despues di mas di 400 dia di silencio, e falta di accion di e actual Gobierno riba e maneho di nos infrastructura ta keda demostra un biaha mas. Ta keda confirma cu un suma di 18 miyon florin, cu tabata specialmente destina pa asfalta caminda, a keda sin wordo uza. Esaki no solamente ta un oportunidad perdi pa drecha nos careteranan, sino un falta di respet pa e fondonan publico y pa e seguridad di e cuidadano cu tur dia mester transita den camindanan den mal estado.
Como parlamemtario, mi ta cuestiona seriamente e echo cu e placa aki tabata disponibel, camindanan stipula a base di criterio di DOW y cla pa start cu ehecucion, y toch e Gobierno actual a opta pa no haci nada. Un aña completo sin accion pa loke ta trata asfaltamento di camindanan. E fondonan aki a keda aloca na December 2024 cu e meta pa mira resultadonan concreto den 2025. Sinembargo, nos ta den Mei 2026 y e realidad ta cu e minister concerni no por duna un splicacion debido pa hustifica dicon no a uza e 18 miyon florin aki.
Tempo y placa perdi
Goberna ta nifica pone prioridad, y den e caso aki, e prioridad no tabata cerca e bienestar di e pueblo ni e mantencion di nos camindanan. Ora cu un Gobierno haya fondonan extra y un plan structural den ehecucion, e unico cos cu falta ta boluntad y transparencia.
Silencio no ta un contesta
E minister no por keda sin responsabilisa su mes: pakico no a uza e 18 miyon pa drecha nos careteranan? Un oportunidad perdi! Un situacion Inhustificabel pasobra ta dificil pa compronde dicon despues di 403 dia di “silencio”, ningun di e camindanan identifica pa wordo drecha
of pa porfin haya asfalt, no a mira ni un gota di asfalt.
Exigencia pa transparencia
Como parlamentario, nos tin cu para keto riba e echo cu placa di pueblo mester wordo uza pa loke el a wordo acorda. Ora cu 18 miyon florin “bay perdi” den e burocracia of falta di decision di un minister, e ta afecta e credibilidad di henter nos gobernacion.
Nos no por permiti cu inversionnan vital pa nos pais keda para simplemente, pasobra e minister no kier of no por ehecuta. Pueblo di Aruba merece sa dicon e placa aki no a wordo uza y ken ta bay carga e responsabilidad pa e retraso aki cu ta afecta nos tur.
