ORANJESTAD – Un grupo amplio di sindicatonan di Aruba a presenta un carta na Parlamento di Aruba den cual nan expresa nan posicion tocante e avance di e propuesta di ley di consenso Reino HOFA. E carta, fecha 7 di Mei 2026, ta firma pa varios sindicato y organizacion laboral di pais.

Den e comunicacion, sindicatonan ta indica cu nan posicion ta basa riba reunionnan anterior cu Parlamento y riba analisis di diferente consehonan institucional. Nan ta referi particularmente na e conseho emiti pa Raad van Advies di Aruba, den cual a wordo menciona diferente preocupacion di caracter constitucional y democratico.

Segun e carta, sindicatonan ta considera cu tin cuestionnan importante relaciona cu balanse entre supervision financiero y autonomia constitucional di Aruba. Tambe nan ta expresa preocupacion cu e modelo proponi por tin implicacion pa e rol di Parlamento y pa e soberania presupuestario di pais.

E organizacionnan sindical ta señala cu nan no ta opone cooperacion den Reino ni supervision financiero engeneral, pero cu nan tin obhecion riba e forma y structura actual di HOFA. Nan ta enfatisa cu supervision financiero mester tuma na cuenta e marco constitucional y e proceso democratico local.

Den e carta, sindicatonan ta haci un apelacion na Parlamento pa reconsidera e trayecto actual di e ley di consenso y pa evalua si e propuesta ta den interes di Aruba. Nan a propone pa Parlamento por discuti e asunto adicionalmente y determina si tin suficiente consenso pa sigui cu e proceso den su forma actual. Pues nan ta pidi pa bini cu un mocion y laga parlamento vota.