Minister Plenipotenciario, sra. Zulema Dabian-Erasmus ta representando Aruba na Washington D.C. desde 2024. Den su posicion e ta construyendo relacionnan cu por habri porta pa oportunidadnan nobo pa nos isla. Un aspecto di esaki ta empoderando hobennan di Aruba pa nan haya acceso na oportunidadnan na Merca, pa guia nan, conecta nan cu hende y institucionnan y laga nan mira cu nan talento por yega leu.
Un biaha mas Minister Plenipotenciario lo tene un sesion virtual riba diaranzon 27 di mei pa studiantenan di Aruba cu ta na Merca, Canada, Hulanda of cualquier otro pais studiando den e area di Sciencia, Tecnologia, Ingenieria y Matematica (STEM). E sesion ta tuma lugar 11.00 am EST (ora di Aruba) y 5.00 pm na Hulanda.
Cu e sesion aki, Minister Plenipotenciario na Merca kier conecta studiantenan cu profesionalnan den STEM riba temanan cu ta relevante pa Aruba pa asina comberti nan pasion y conocemento den un impacto local.
E SISSTEM Program di Universidad di Aruba lo presenta diferente tema di research cu Aruba mester di dje den e area di sostenibilidad, resiliencia, tecnologia y otro solucionnan innovativo pa nos isla. Asina e studiante den STEM, aunke e ta biba pafor di Aruba, ta haya sa kico ta e temanan cu mas ta toca un isla manera Aruba. Y e studiante por haya interes y haci investigacion den cuadro di su estudio cu por yuda Aruba. Na final ta conecta e studiante bek cu Aruba den un manera cu ta trece balor cu ta riba e nivel di conocemento.
Durante e sesion aki tambe lo tin un presentacion di The STEM Embassy. Esaki ta un fundacion lidera pa profesionalnan Arubiano den STEM. Nan ta biba pafor di Aruba, pero ta organiza diferente iniciativa pa empodera muchanan di scol na Aruba y motiva nan pa studia den e area di STEM.
Aunke e sesion ta enfoka riba temanan di investigacion na Universidad di Aruba, e sesion aki tambe lo ta habri pa studiantenan di nos islanan ruman den Reino. Tur nos islanan tin retonan similar y door di scucha ehempelnan di Aruba, e studiante di Corsow of Sint Maarten por aplica esaki tambe den nan estudio pa nan isla.
E sesion virtual lo tuma luga riba Diaranzon 27 di mei, 2026 pa 11.00 am (EST) y 5.00 pm (CEST). Pa participa, por registra aki LINK Virtual Session STEM of via di e QR code riba e flyer. Despues di a registra lo ricibi e zoomlink pa e sesion.
