MIGUEL MANSUR: CUANTO VALE EL SHOW?
Recientemente nos a mira Minister di Infrastructura kita klinker dilanti camera pa anuncia otro
‘inicio’ di revitalisacion di centro di ciudad. Pero revitalisacion real no ta cuminsa cu camera ni
cu klinker, e ta cuminsa cu solucion structural. Durante decadanan, distinto gobierno a papia di
rebiba centro di ciudad sin logra resultado duradero. E tres problemanan principal cu ta afecta
centro di ciudad ta:
- adicto ambulante,
- falta di parkeerplaats (acceso facil),
- y un sistema di tram inadecua.
Sin atende e problemanan structural aki, e intento actual probablemente lo termina manera tur
intento anterior.
Modifica leynan di curatela pa permiti tratamento obligatorio di largo plaso pa adictonan
ambulante mester tabata un di e prome prioridadnan. Proceso legislativo na Aruba ta largo,
leynan cu no ta cla den e prome añanan di gobernacion hopi biaha no ta finalisa prome cu
proximo eleccion.
Exito di centro di ciudad ta depende riba acceso facil y comodo. Actualmente, si tur edificio den
Caya Grandi tabata ocupa completamente, simplemente no tin suficiente espacio pa empleado
ni cliente parkeer. Minister di Economia tin cinco aña den poder, si ta apenas awor nan ta
sondea posibilidad pa parkeer garashi, ta poco probabel cu infrastructura esencial lo ta cla na
tempo.
Tambe tin e asunto di tram. E idea original di un tram cu ta core solamente riba spoor semper
tabata limita pa su gasto exorbitante y falta di flexibiliad. Yora foutnan di pasado no ta yuda, e
pregunta importante ta si gobierno tin curashi suficiente pa coregi nan.
Ainda tin oportunidad pa transforma Arutram den un sistema mas practico y eficiente, usando
vehiculonan cu por circula riba caminda regular tambe, similar na Coral Gables Trolley. Esaki lo
permiti habri Caya Grandi bek pa trafico mientras cu e servicio di tram ta continua. Asina por
expande e rutanan pa inclui otro area importante manera Wilhelminastraat y integra miho cu
transporte publico nacional.
Como mandatario bo semper tin un escogencia. Por lansa un plan serio di reforestacion cu un
plan di irigacion, mantencion y vision pa largo plaso. Of bo por planta mata dilanti camera sin
structura pa cuida nan despues. Cua ta mas efectivo den produci e resultado desea?
Despues di mas cu un aña di gobernacion, e logronan mas menciona ta aumento di pensioen y
subida salarial pa docente. Ambos ta importante, pero tambe ta importante reconoce cu nan a
wordo financia gran parti cu entrada genera door di medida fiscal di gobierno anterior.
Durante oposicion, e dos lidernan politico cu ta forma gobierno, a pasa añanan argumentando
cu pueblo no por carga mas medida. Pero ora nan a yega na poder, no solamente nan a
mantene tur e medidanan, nan a aumenta gasto publico cu e mesun entrada cu anteriormente
nan tabata condena.
Politiconan cu ta argumenta cu reduccion of eliminacion di BBO/BBO NA FRONTERA no lo
impacta prijsnan ta ignora un principio basico di mercado. Den un economia liber, reduccion di
cargo fiscal normalmente ta crea espacio pa prijs baha y pa actividad economico aumenta,
specialmente ora tin competencia husto y acceso igual na mercado.
Finalmente, nos a tende recientemente cu DIMP y Ministerio di Finansas a anuncia cu
contribuyentenan awor tin acceso na nan cuenta digital. Mi mes tabata uno di e prome
personanan pa intenta usa e sistema, solamente pa descubri cu si un ciudadano tin compania of
fundacion, e acceso ta incompleto y limita.
Despues di gasta dos miyon florin pa digitalisacion, gobierno ainda no por ofrece algo asina
basico manera acceso integra na cuenta di impuesto personal y comercial di un contribuyente.
Mi no sa si esaki ta algo pa minister celebra pero sigur esaki mester wordo mira como un señal
cu nos servicionan publico ainda tin hopi pa mehora.
Sin critica constructivo, Aruba lo sigui confundi anuncio cu progreso y apariencia cu resultado.
Nos pais no falta talento ni potencial, loke falta ta boluntad politico pa enfrenta problema
structural cu seriedad y un sentido di urgencia.
