Shailiny Tromp-Lee: Gobierno no por sigui reacciona temporalmente: Aruba mester un vision y plan concreto a largo plaso

E anuncio di un otro aumento den prijs di combustibel ta confirma un realidad cu hopi famia na Aruba ya ta sinti tur dia: costo di bida ta sigui subi mientras Gobierno ainda no a presenta ningun plan structural y concreto a largo plaso.

Entrante 13 di mei 2026:

• Gasolin lo subi di Afl. 2,48 pa Afl. 2,65 pa liter (+6.9%)

• Diesel lo subi di Afl. 2,47 pa Afl. 2,57 (+2.6%)

• Kerosin lo subi pa Afl. 3,02 pa liter

Gobierno a bisa cu nan ta absorba mita di e aumento door di baha “accijns” temporalmente. Pero e pregunta principal ta: Te cuanto Gobierno por sigui absorba e aumentonan aki? Como Parlamentario mi ta profundamente preocupa cu nos no ta tende ningun strategia claro pa 2027. Durante reunionnan cu Gobierno nos a wordo asegura cu awa y coriente tabata “bou di control”, pero e documentonan oficial di WEB cu Parlamento a ricibi ta mustra un otro realidad.

WEB ta confirma cu:

• 95% di e consumo di zeta pa 2026 ta gehedged;

• Pero entrante januari 2027 Aruba lo keda 100% exponi na prijsnan internacional;

• Y cu esaki por obliga un aumento di tarifa di awa y coriente.

Esaki ta un señal serio cu no por wordo ignora. 

Mi a manda preguntanan oficial na Minister di Finansa, Asuntonan Economico y Sector Primario tocante:

1. E falta di un plan concreto pa evita un “tariefshock” na 2027;

2. Si tin un strategia nobo di hedging;

3. Si tin un buffer financiero;

4. Y con Gobierno ta prepara pa un scenario caminda prijsnan internacional ta sigui subi.

Mi preocupacion tambe ta grandi riba nos seguridad energetico. WEB ta depende totalmente riba Heavy Fuel Oil y e crisis den Medio Oriente y Strait of Hormuz ta aumentando riesgo y volatilidad mundial. Mi ta haya preocupante cu WEB mester a busca confirmacion proactivo di FMSA pa sa si suministro di energia di Aruba tabata garantisa.

Accion concreto a largo plaso: Basta cu reaccionnan temporal

Pueblo ta merece transparencia y preparacion serio, no solamente reaccion temporal cada biaha cu mercado subi. Mientras Gobierno ta bisa cu “tur cos ta bou di control”, nan propio departamentonan ta analisa subida di inflacion, subida di bunker surcharge, aumento den prijs di petroleo y presion creciente riba costo di bida.

Mi ta sigui insisti riba:

✔️ Un plan di defensa economico y energetico;

✔️ Proteccion real pa poder di compra;

✔️ Mas transparencia;

✔️ Y comunicacion honesto cu Parlamento y pueblo.

Nos pueblo no por keda den incertidumbre mientras e cartera di nos hendenan ya ta bou di hopi presion. Aruba mester liderazgo cu vision, preparacion y accion concreto a largo plaso.