Den presencia di Prome Minister di Hulanda Robe Jetten, Ministernan di Aruba, representante di Aruba y partnernan di sector publico y priva, a tuma lugar e VIP-première di e documental “The Six – Discovering Dutch Caribbean Nature: Aruba” na Renaissance Convention Centre.
E evento a forma parti di e proyecto multimedia WOW!, un iniciativa amplio cu ta busca conecta e seis islanan Caribe di Reino Hulandes door di admiracion, conciencia y accion pa proteha naturalesa.
Durante e ceremonia, cofundador di WOW!, Bianca Peters, a comparti e origen y vision di e proyecto, señalando cu e idea a nace for di un pregunta fundamental: con pa conecta e Reino como un solo.
“Nos por conecta si nos haya algo cu tur hende ta stima. Y tur hende ta stima naturalesa,” el a expresa, splicando cu WOW! a surgi como un plataforma pa uni comunidadnan door di un apreciacion comparti pa e beyesa y fragilidad di nos islanan.
E iniciativa, cu a cuminsa den 2018 como parti di un esfuerso pa sostenibilidad di islanan, a evoluciona den un proyecto multidisciplinario cu ta inclui documentarionan, un pelicula cinematografico, programa educativo, podcast y un base di dato cientifico, orienta riba educacion, innovacion y tumamento di decisionnan basa riba dato.
Un momento simbolico di e anochi tabata ora Prome Minister di Hulanda, Rob Jetten, Su Excelencia Gobernador di Aruba Alfonso Boekhoudt y Prome Minister Mike Eman a lansa oficialmente e documental, primiendo e start pa e presentacion.
Durante su reaccion, Premier Jetten a expresa su admiracion pa e naturalesa unico di e islanan Caribense, señalando cu cada bishita ta un experiencia special.
“E ta un regalo cada biaha cu nos por experencia e beyesa di naturalesa aki,” el a indica, añadiendo cu e documental ta brinda oportunidad pa mas hende descubri e rikesa natural di e region.
E Prome Minister Hulandes a enfatisa tambe e importancia di proteha biodiversidad, indicando cu cambio climatico ta representa un menasa real pa naturalesa y comunidadnan.
“E ta importante cu produccionnan manera WOW! ta inspira mas hende pa reflexiona riba kico nan mes por haci pa proteha naturalesa,” el a agrega.
Prome Minister Eman, di su banda, a pone enfasis riba e dimension mas profundo di e proyecto, señalando cu naturalesa ta un elemento clave pa conexion humano y identidad dentro di Reino.
“Nos mester busca e lineanan invisibel cu ta conecta nos como islanan y como Reino. Den naturalesa nos ta haya un base pa compronde ken nos ta y unda nos ta bay,” Eman a indica.
El a subraya cu iniciativa manera WOW! ta yuda fortalece e sentido di pertenencia y orguyo, mustrando cu e Reino no ta separa, pero ta un conhunto di paisnan cu ta comparti beyesa, cultura y responsabilidad.
Den sala tabata presente Conseho di Minister, partnernan clave manera Aruba Tourism Authority, Aruba Conservation Foundation y otro stakeholdernan, reflehando e amplio respaldo pa e iniciativa.
E documental di Aruba ta pone enfasis riba e beyesa, vulnerabilidad y resiliencia di su ecosistema, mientras cu e proyecto en su totalidad ta subraya cu e seis islanan no ta separa, pero ta parti di un solo ecosistema y un Reino cu ta comparti responsabilidad.
E première aki ta marca un paso importante den e uzo di storytelling como instrumento pa conecta cultura, naturalesa y politica, creando un base pa mas comprension mutuo, conciencia ambiental y colaboracion dentro di Reino Hulandes.
