Durante fin di siman, minister di Husticia, Integracion, Transporte Publico y Energia, mr. drs. Arthur Dowers, acompaña pa Director di Cuerpo Especial Arubano Richard Kramers y personal di KIA y CEA, a ricibi un presentacion riba e uzo di un “drone jammer”, un aparato sofistica cu lo yuda fortifica siguridad rond di prizon na Aruba.
No ta un secreto cu diariamente tin personanan cu ta busca manera pa burla di nos leynan y ta haci uzo di drone pa trece contrabanda di productonan ilegal den KIA. E situacion aki ta pone siguridad, control y trankilidad den e facilidad coreccional bao di presion.
Debi na esaki, Cuerpo Especial Arubano (CEA), cu ta encarga entre otro cu proteccion y siguridad di prizon, a adkiri un drone jammer pa intercepta y stop dronenan cu ta drenta den e no fly zone di prizon.
Actualmente un grupo selecta di personal di CEA cu ta traha na KIA, ta den entrenamento pa por maneha e drone jammer di manera optimal pa asina unabes cu detecta presencia di drones den cercania di e facilidad coreccional, por actua y tuma control di e drone prome cu esaki logra baha su mercancia riba tereno di KIA. Ta trata aki di tanto droga, telefon y otro productonan prohibi paden di e murayanan di KIA.
Durante e presentacion, a bay mas profundo riba funcionamento di e tecnologia y con e aparato lo yuda den combati contrabando y otro actividadnan ilegal relaciona cu prizon.
Minister di Husticia a indica cu no por tolera situacionnan cu ta pone siguridad di nos sistema coreccional na riesgo y ta inverti den tecnologia moderno pa fortifica siguridad nacional y mantene control efectivo den prizon di Aruba.
