Hulanda ta pidi debate amplio, pero AVP-Futuro no a busca apoyo den Parlamento
Den un declaracion reciente, Premier di Hulanda, Rob Jetten, a bisa algo cu pa hopi hende na Aruba ta importante y revelador. Sin ataca directamente e gobierno di Aruba, su palabranan ta laga un impresion cla: un tema grandi manera HOFA no mester wordo maneha den secreto ni solamente entre un grupo chikito di politiconan.
Jetten a bisa cu e ley HOFA ta importante pa futuro financiero di Aruba y cu e lo por duna Aruba mihor oportunidad pa presta placa y inverti den desaroyo economico. Pero e punto mas importante di su mensahe tabata otro: e necesidad pa tin debate amplio y sosten politico grandi den Parlamento di Aruba.
Segun Jetten, entre mas amplio e apoyo politico ta, entre coalicion y oposicion, mas stabilidad y seguridad lo tin pa futuro di Aruba.
Y ey ta hustamente unda hopi critica ta nace.
Gobierno a negocia HOFA sin informa Parlamento suficientemente
Manera ta conoci, e gobierno AVP-Futuro ya tabata haci acuerdonan cu Hulanda tocante HOFA desde augustus 2025. Despues, na maart 2026, tabatin otro momento importante den e proceso.
Pero durante tur e periodo ey, Parlamento no tabata totalmente informa. Oposicion tampoco no tabata involucra den un manera amplio. Y hopi ciudadano no tabata compronde exactamente kiko tabata wordo negocia cu Hulanda.
Awor cu Premier Hulandes mes ta bisa cu un tema asina importante mester haya debate amplio y sosten grandi, hopi hende ta haci un conclusion simpel:
Si Hulanda mes tabata spera mas participacion politico, pakico e gobierno di Aruba no a busca esey for di principio?
Pa pueblo compronde: imagina un famia cu ta firma un gran prestamo den secreto
Pa pone e situacion simpel, imagina un famia unda solamente dos miembro decidi firma un gran prestamo cu banco. Nan no ta informa resto di famia, no ta haya opinion di otro miembro, y no ta splica claramente kiko e acuerdo ta implica. Despues, e banco mes ta bisa:
“Nos a pensa cu henter e famia lo discuti esaki.”
Esaki ta mas o menos e impresion cu e palabranan di Rob Jetten ta laga.
Transparencia ta bira e pregunta principal
HOFA no ta solamente un ley tecnico. E ta toca autonomia di Aruba, control financiero, maneho di gobierno y futuro economico di e isla. P’esey hopi ciudadano ta sinti cu e tema no mester tabata maneha den un circulo sera. E declaracion di Rob Jetten awor ta pone mas presion riba e gobierno pa splica pakico Parlamento y of oposicion no a wordo inclui mas temprano den e proceso.
Pasobra si mesun Hulanda ta papia di “amplio sosten politico”, e pueblo naturalmente ta puntra:
pakico e gobierno no a traha pa logra esey desde day one?
Declaracion di Jetten ta pone fin na retorica “Evelyn a firma”
Cu e declaracion di Rob Jetten, awor tin un fin na e ponencia fofo di AVP cu ta “Evelyn a firma”.
Jetten ta confirma cu loke Evelyn Wever-Croes a firma no ta mara Aruba ni automatico ni completo. Segun su propio palabranan, e proceso ainda mester wordo trata ampliamente den Parlamento di Aruba y mester haya debate politico y sosten amplio.
Esaki ta cambia hopi den e discusion publico. Pasobra durante largo tempo, e mensahe politico tabata cu “ya e ta firma” y cu practicamente no tin nada mas pa discuti.
Pero awor, mesun Hulanda ta reconoci cu Parlamento ainda tin un rol central den e proceso.
