FIFA a presenta e yerba natural nobo cu a wordo instala den e stadion AT&T na Arlington. E cancha aki lo ta e escenario pa nuebe partido di e Copa di Mundo 2026, incluyendo un di e semifinalnan, como parti di e preparacionnan p’e torneo cu lo cuminsa dia 11 di juni proximo.
Durante un evento realisa na Arlington, den e area metropolitano di Dallas, directiva di e stadion y representantenan di FIFA a duna detaye di e cambionan den e facilidad, cual habitualmente ta uza yerba artificial p’e partidonan di NFL.
“E proceso di transformacion di e stadion tabata extenso y a inclui mehoracion den tur e clubnan y areanan principal p’e fanaticonan,” e gerente general di e stadion, Tod Martin, a declara.
Martin a explica tambe cu e yerba natural a wordo cultiva na Colorado y instala pa e compania Precision Turf despues di un logistica complica. “E yerba a wordo prepara, transporta y instala cuidadosamente pa garantisa e miho condicionnan posibel durante e torneo,” el a señala.
Pa mantene e tereno den un estado optimo durante e competicion, lo uza sistemanan avansa di iluminacion artificial, riegas, filtracion di aire y control di temperatura.
Di su parti, e hefe di infrastructura di campo di hunga di FIFA, Ewen Hodge, a destaca un investigacion cu a dura cinco aña, realisa hunto cu Universidad di Tennessee y Universidad Estatal di Michigan.
“E investigacion a enfoca riba e bienestar di e hungadonan, e uniformidad di e terreno y e adaptacion na e clima,” Hodge a indica. El a subraya tambe e uzo di “tecnologia innovador y sistemanan di cose e superficie diseña especificamente pa e stadionnan di e Mundial 2026.”
E autoridadnan a papia tambe riba aspectonan di transporte, coordinacion di siguridad y e experiencia di e fanaticonan den e areanan rond di e stadion.
E AT&T Stadium na Arlington lo ta un di e sedenan principal di e Mundial 2026 y lo ricibi miles di fanatico di diferente parti di mundo durante e competicion.
