Cu un ceremonia di apertura festivo y simbolico den e bario di Seroe Patrishi, e evento di boluntario mas grandi na Aruba, ARUBA DOET, a habri oficialmente awe. Rond di henter nos isla, for di Noord te cu San Nicolas, boluntarionan a cuminsa cu hopi entusiasmo riba e prome di e dos dianan di accion.
Un apertura exitoso na Seroe Patrishi E apertura oficial a tuma luga den bario di Seroe Patrishi, unda e proyecto “Hunto pa Seroe Patrishi” ta wordo ehecuta. E iniciativa aki, cu ta un colaboracion entre studiantenan di Universidad di Aruba, FCCA y CEDE Aruba, tin como meta pa mehora e areanan di recreacion den e bario. Durante e apertura, e invitadonan special, entre nan Su Excelencia Gobernador Alfonso Boekhoudt y Sr. Daniel Tecklenborg di CEDE Aruba, a subraya e importancia di traha hunto y e impacto positivo cu boluntarismo tin riba nos comunidad.
130 Proyecto den ejecucion Awe e prome dianan di trabou a inicia pa un total di 135 proyecto. Na diferente fundacion, scol, scouting y clubnan deportivo, boluntarionan ta dunando nan maximo esfuerso pa mehora nan entorno. Sea ta pa medio di limpieza, mantencion of pintura di canchanan di deporte, e energia y solidaridad ta bisto den tur skina di Aruba.
Un danki grandi na comunidad
Organisacion di ARUBA DOET kier gradici e pueblo di Aruba di curason pa e gran apoyo ricibi. Un danki special ta bay na:
- Tur e boluntarionan cu a duna nan tempo y esfuerso pa yuda otro.
- E organisacionnan, scolnan y clubnan cu a prepara y guia e proyectonan aki conhuntamente.
- E compañianan y partners pa nan contribucion valioso y compromiso social.
ARUBA DOET ta un iniciativa di Oranje Fonds y ehecuta pa CEDE ARUBA, y ta e participacion masal aki ta loke ta haci e evento aki un exito rotundo cada aña.
