Dios a traha nos tur den Su imagen y Su semehansa, pa nos por ta yuinan di Dios y yuinan di lus, pa Su Spirito Santo por goberna nos bida, na e momento cu nos acepta Cristo Hesus como nos Senjor y Salbador.
Nos no ta yama pa cana den scuridad, y haci cosnan cu no ta den boluntad di Dios, pasobra e lus di Dios ta goberna nos bida.
Ta di berdad cu nos ta biba den tempo trabahoso, e palabra di Dios ta mustra nos esey den 2 Timoteo 3 : 1-5, y esun cu no kier kere, awor e por mira, pasobra ningun hende por tapa solo cu un dede.
Ta berdad cu e binida di nos Senjor Hesus Cristo ta serca, pronto e lo bin busca Su pueblo, cual ta esnan cu ta biba pa E, y cu e speransa di bay cun’E.
Pero encuanto nos decensia ta un dolor hopi fuerte:
No tin respet pa hende ni pa bida di hende.
Amor matrimonial y familiar a fria.
No tin respet entre esposa y esposo y entre mayor y yiu.
Adulterio ta kibrando hopi matrimonio.
Sensualidad ta causando hopi pleito.
Hende ta papia malo di otro, y ta parce manera kibra otro ta un delicia.
Bistimento perverso a bira un arte, y ta cay den categoria sexy.
Pidi despensa, para den rij warda bo beurt, bisa bon dia ora bo drenta un lugar a bay for di moda.
Ta poco hende ta tene cuenta cu palabra malo ( sushi) no ta parti di nos vocabulario.
Ta parce manera mas violento un hende ta , mas great e persona ta.
Ta parce manera mas nos bebe, parandia, y droga mas largo nos bida lo ta.
Ta parce manera mas muher un homber casa por tin mas homber e ta.
Ta parce manera un muher casa cu tin mas homber ta un muher balente.
Hopi hende ta keda keto pa no perde amistad, pero nos no ta yama pa consenti cu maldad.
Si bo sa cu un hende ta haci cos robes, bo tin cu bise den su cara cu sinceridad, cu e ta robes.
No wak si e ta duna bo placa, ni tampoco cuminda,pero bise su berdad pa salba su alma.
Coregi bo yiu , aunke e rabia, no lage biba con cu ta, y evita berguensa den henter famia.
No bay tras di sistema moderno di mundo, pero renoba bo mente, y haci e boluntad di Dios.
No ta pasobra mundo ta bayendo atras den decensia y respet nos tin cu forma parti di e bagamunderia.
Laga nos comporta nos mes decentemente manera den dia,no den parandiamento,y den buracheria,no den inmoralidad sexual, den sensualidad,no den pleito,y envidia. Ma bisti boso mes cu Senjor Hesus Cristo, y no haci provision pa e carni, pa cumpli cu su mal deseonan.( Romanonan 13:13-14).
No laga nos lubida cu tin consecuencia pa tur esnan cu no ta hanja necesario pa reconoce Dios cual ta para scirbi den Romanonan 1:28-32.
Laga nos tur tene na cuenta locual ta para scirbi den Juan 3:16 y locual tin para scirbi den Juan 3:36.
Ta tempo pa nos tur realisa cu locual tin para scirbi den Galationan 6 :7-8 ta conta pa tur hende, pasobra ningun hende no por ganja Dios, y dilanti di Dios tur cos ta habri y ningun hende tin bida priva , pasobra Dios ta mira tur cos.
Ta para scirbi den 1 Juan 1:9: Si nos confesa nos pica E ta fiel y husto pa pordona nos pica y libra nos for di tur inhusticia.
Sinceramente, Pastor Marcel Balootje
