Gobierno di Aruba ta continua fortalece e cooperacion di conseho socio-economico den Reino Hulandes. Durante un reunion na Den Haag, Hulanda Prome Minister mr. Mike Eman a reuni cu prof. dr. Kim Putters pa papia tocante e desaroyonan economico y social cu Aruba y Hulanda ta enfrenta como tambe e importancia di fortalece cooperacion entre e diferente Consehonan Sociaal-Economico den Reino.
Durante e reunion, prof. dr. Kim Putters a enfatisa cu SER (Sociaal-Economische Raad) Hulanda ta mantene un relacion di hopi aña y un cooperacion estrecho cu SER Aruba, SER Corsou y SER Sint Maarten, y tambe cu e plataformanan di dialogo social na Boneiro, St. Eustatius y Saba. Segun Putters, ta di gran importancia p’e paisnan den Reino sigui siña uno di otro y intercambia experencia y conocemento tocante e retonan moderno den economia y sociedad.
Entre e temanan cu a trata tabatin energia renobabel, migracion laboral, sostenibilidad y e necesidad pa mehora e posicion socio-economico di e gruponan mas vulnerabel den nos sociedad. Tur dos lidernan a reconoce cu hopi di e retonan aki ta comun den henter Reino y cu cooperacion y dialogo permanente entre gobierno, sindicato y sector comercial ta esencial pa logra solucionnan duradero.
Prome Minister Mike Eman a expresa su aprecio p;e cooperacion continuo cu SER Hulanda y a enfatisa e importancia di comparti “best practices” pa asina crea miho condicionnan di bida p’e trahadornan y famianan cu ta enfrenta e varios dificultad financiero. E reunion a confirma e compromiso comparti pa sigui fortalece e relacionnan dentro di Reino y traha hunto pa un futuro mas resiliente, inclusivo y sostenibel pa tur ciudadano den Reino Hulandes.
