Gobierno a lansa oficialmente e plataforma digital Taxi.aw, unda cu turista y local awo no solamente por mira tarifa oficial di taxi online, pero tambe por entrega keho directamente contra taxistanan den caso di overcharge of cualke otro mal servicio.
Segun informacion oficial, e website nobo ta permiti usuario reporta diferente situacionnan relaciona cu servicio di taxi, incluyendo cobro excesivo, violacion di regla of trato inapropia.
Cu e sistema aki, Gobierno kier crea mas transparencia y duna pasaheronan un forma mas facil pa haci nan voz tende ora tin problema cu servicio di taxi.
Na e website, usuario por yena informacion di e taxi, e trayecto y e problema cu a pasa. Autoridadnan lo revisa e kehonan cu drenta via e plataforma.
Minister Arthur Dowers a indica cu Taxi.aw ta parti di e modernisacion di sector di transporte publico y cu e meta principal ta pa aumenta confianza entre turista, local y taxistanan cu ta traha honestamente.
Gobierno tambe ta enfatisa cu gran mayoria di taxistanan na Aruba ta cumpli cu nan trabou corectamente y ta brinda bon servicio diariamente, pero cu e sistema nobo lo yuda controla e poconan cu ta afecta e reputacion di sector.
