Mientras mundo ta cambia riba un velocidad nunca antes bisto, fraccion di PPA ta kere firmemente cu Aruba no por keda para keto. Basa riba nos Plan Nos Aruba 2050, e vision di prepara nos comunidad pa futuro y cu nos kier reforsa y sostene e posicion di nos centronan di bario como centronan pa desaroyo y educacion comunitario, PPA a organisa hunto cu dos experto; sr. Waslander y sr. Bislip den Inteligencia Artificial, un encuentro informativo pa Centronan di Bario. E encuentro tabata enfoca riba con tecnologia aki por bira un herment positivo pa e.o. educacion, negoshi y desaroyo comunitario.
Pa parlamentario Eduard Pieters, esaki no tabata djis un charla tocante tecnologia, pero un paso concreto den direccion di un Aruba mas prepara, moderno y competitivo.
Inteligencia Artificial ta realidad di awe
Segun Pieters, Inteligencia Artificial ya no ta algo leu of exclusivo pa empresa grandi na exterior. “E ta tocando nos bida diario caba,” el a enfatisa. “Y si nos no educa nos pueblo awe, mañan nos comunidad lo keda atras.”
E encuentro a nace despues cu PPA a conecta cu sr. Waslander y sr. Bislip, dos experto den Inteligencia Artificial, cu ta comparti mesun preocupacion y vision cu ta den Plan Nos Aruba 2050 di PPA.
E Centronan di Bario como motor di desaroyo
Un di e puntonan central den Plan Nos Aruba 2050 ta fortalece e centronan di bario, pa nan no ta solamente un lugar di reunion social, pero tambe centro di conocemento, innovacion y desaroyo humano.
“Nos kier p’e centronan di bario bira un lugar, unda hende por sigui siña, crece y adapta nan mes cu e cambionan di mundo,” Pieters a splica.
Segun e plan cu tin awo riba mesa ta pa cada centro di bario desaroya e sesionnan y programa relaciona cu Inteligencia Artificial, adapta pa diferente grupo meta: muchanan, hobennan, adulto mayor, profesionalnan y entrepreneur.
Tecnologia cu por yuda hende avansa
Durante e encuentro a discuti con Inteligencia Artificial por yuda e negoshinan chikito y mediano, mehora servicio, crea business plan, organisa trabou y hasta fortalece creatividad y productividad. Pero Pieters a enfatisa cu e punto principal no ta solamente tecnologia, sino educacion y conscientisacion.
“Inteligencia Artificial por ta un herment poderoso pa progreso, pero tambe bo mester siña hende con pa uza esaki cu responsabilidad,” el a bisa. “Tecnologia no ta peligroso. Tecnologia manera Inteligencia Artificial sin di educacion si.”
Educacion no ta limita na scol
Pa PPA, e iniciativa aki ta conecta directamente cu nan vision di “educacion pa bida largo”, unda siñamento no ta stop despues di scol, pero ta continua den comunidad y den bida diario.
“Un pais fuerte ta uno cu ta keda inverti den conocemento di su pueblo,” Pieters a enfatisa. “No solamente den klas, pero den tur contexto relevante pa mehora calidad di bida.”
“Nos comunidad mester ta prepara pa mundo nobo”
Fraccion di PPA a expresa gradecimento na e dos profesionalnan, cu a brinda nan experiencia y cu ta dispuesto pa sigui traha cu comunidad riba e topico aki. Segun Pieters, esaki ta apenas e prome paso. “Awe nos a tira un petalo di rosa den lama cu lo crea olanan grandi di desaroyo y educacion comunitario. Nos no por para mira mundo cambia, mientras Aruba ta keda atras,” el a conclui. “Nos tin cu prepara nos pueblo, nos hobennan y nos entrepreneurnan pa un realidad nobo. Y e realidad ey ya ta aki.”
