Minister di Finansa, Asunto Economico y Sector Primario, mr. Geoffrey Wever, hunto cu e team di Directie Financiën a sigui cu e proximo presentacion tecnico di Policy Based Budgeting. Como continuacion di e sesionnan organisa na luna di januari cu diferente departamentonan y servicio interno di gobierno, ariba dialuna ultimo, Minister di Finansa, Asunto Economico y Sector Primario, mr. Geoffrey Wever, a reuni cu e organonan principal cu tin e rol di supervision di gobierno, CAFT, ARA, RvA , Griffier di Staten di Aruba, VNO y bishita special di sr. Andreas Burger di TWO NL , den e proseso pa introduci Policy Based Budgeting (PBB) pa e begroting di 2027 bai padilanti.
Durante e presentacion, a pone enfasis riba e meta di implementa un forma di gobernacion mas fuerte, basa riba miho control y mayor transparencia. E participantenan ta wordo mira como partnernan clave pa contribui na un sistema cu ta conecta maneho cu e ehecucion diario den nos pais.
Policy Based Budgeting a wordo presenta como un “brug” entre formulacion di maneho y presupuesto cu ta wordo prepara pa ehecucion di e maneho. E modelo ta enfoca riba claridat tocante: ken ta haci kiko, di ki manera y ken ta responsabel, cu e fin pa crea un forma di traha unda tur instancia ta papia e mesun idioma y por colabora di forma mas efectivo.
Un di e elementonan central di e modelo ta e sistema di “tres lineanan”, unda servicio operativo, funcionnan di control y instancianan di supervision ta wordo conecta y alinia cu e metanan di gobernacion y maneho. Esaki lo permiti evaluacion mas structura, determinacion di prioridadnan y un miho relacion entre maneho, recurso y decisionnan.
A enfatisa cu e implementacion di PBB ta un modelo di crecemento a largo plazo, cu lo wordo introduci paso pa paso:
2025–2026: fase di conscientisacion
2027–2029: adaptacion y ahustando di e prome linea cu e forma nobo di traha
2030 y adelante: un sistema completamente operacional, basa riba ciclo di mehoracion continuo
Pa e begroting di 2027, e enfoke lo ta riba un structura mas cla y specifico, cu miho conexion entre maneho y e manera cu e ta wordo presenta den e documento di begroting. Tambe lo traha riba mehoracion di e coherencia entre begroting, splicacion y ehecucion.
Durante e sesion, a destaca cu PBB lo funciona como un catalisador pa mehoracion gradual y medibel di informacion di maneho, creando un sistema unda plan, programa y actividadnan ta claramente defini y evalua.
Un otro desarroyo importante menciona ta cu Directie Financien ta trahando riba un programa di capacitacion pa fortalece e capacidad di control y guia e diferente servicio durante e transicion aki. Adicionalmente, lo lansa un plataforma digital unda documentonan oficial manera begrotingnan y jaarrekeningnan lo ta disponibel pa publico, contribuyendo na miho transparencia y fortalece e confiansa den gobierno.
Minister Wever ta gradici Directie Financiën y TWO, pa nan trabou duro y sosten durante e proceso aki, y a conclui cu e ambicion principal di e iniciativa aki ta pa crea un ecosistema duradero, unda e forma di traha ta sigui funciona y entrega resultado, independiente di cambio di liderato politico, cu un impacto positivo sostenibel riba finansa publico di Aruba.
