Federacion Arubano di Futbol (AVB) a anuncia oficialmente e partido final den e categoria Damas Youth (U-17) entre e ekiponan di Britannia y Bubali. E gran cuentro aki lo tuma luga e diasabra aki, 23 di mei 2026, pa 3:00 di atardi na Centro Deportivo Guillermo Trinidad (CDGT) na Dakota. Ambos organisacion a logra avansa pa e etapa decisivo aki caminda nan lo disputa e titulo maximo pa determina cua ta e ekipo cu lo bira campeon di Aruba. AVB a desea tur dos organisacion hopi exito den e gran final aki.
Cu e meta pa garantisa un evento exitoso y organisa, AVB a comparti algun directiva y punto importante cu ambos ekipo, cuerpo tecnico y fanaticada mester tene cuenta cu ne:
- Orario y Acceso: E porta di e stadion lo habri un ora prome cu e partido, esta pa 2:00 di atardi. Ta pidi e entrenadornan pa realiza e keintamento (warming-up) trempan pa asina e partido por cuminsa structuralmente pa 3:00 di atardi, mirando cu tin mas partido programa mas laat pa 6:30 di atardi.
- Fanaticada: E fanaticonan di tur dos ekipo lo mester uza e tribuna cu ta keda parti pabou (banda di Colegio Arubano), caminda e cahero di AVB lo ta ubica.
- Protocol di Inicio: E salida di e hungadonan pa e campo di hunga lo wordo acompaña pa e Himno di FIFA, sigui pa e Himno di Aruba.
- Riba Banki: Cada organisacion tin permiti un maximo di 5 persona adulto riba banki, structuralmente dividi entre Entrenador, Asistent Entrenador, Masahista, Team Leader y un persona extra.
- Reglanan di Wega: Cada ekipo mester percura pa tin nan carnet y formulario di wega debidamente yena na tempo pa e control di e arbitronan. E arbitro principal lo stipula e minuutnan di sosiego pa tuma awa (Cooling-Break) si e ta considera necesario.
- Definicion di e Ganador: Si e partido termina empata despues di e tempo reglamentario, no lo tin tempo extra. Lo pasa directamente pa e tanda di tironan penal (penalty), cuminsando cu 5 tiro pa cada ekipo. Si e empate persisti, lo sigui ehecuta tironan di forma sucesivo te ora cu tin un ganador definitivo.
- Premiacion y Cobertura: AVB lo tin su propio fotografo oficial pa saca potret durante e partido y e ceremonia di premiacion. Pa e clausura, e federacion lo otorga 25 medaya y un copa pa cada ekipo (campeon y subcampeon).
