Presidente di e Comision fiho pa Relacionnan di Reino (KOREL) di Eerste Kamer der Staten-Generaal, Paul Rosenmöller (GroenLinks-PvdA awor yama Progressief Nederland), a resumi e reunion cu delegacion di Gabinete AVP-Futuro como un encuentro “hopi habri, informativo y constructivo”, caminda a dialoga riba diferente tema importante pa futuro di Reino.
Durante e reunion cu Prome Minister mr. Mike Eman, vice-prome minister mr. Gerlien Croes y Ministro Plenipotenciario mr. Mildred Schwengle, a dialoga abiertamente tocante diferente reto y oportunidad cu Reino Hulandes ta enfrenta, incluyendo e “geschillenregeling”, e proximo conferencia di Reino (Koninkrijksconferentie) y e diferencia entre bienestar economico y bienestar social. Rosenmöller a indica cu un di e puntonan central den e reunion tabata e preocupacion comparti tocante e cantidad di persona cu ainda ta biba bou di e “bestaansminimum” .
“Nos a papia tocante e diferencia entre “welvaart” y “welzijn”, y tambe e porcentahe di hende cu ta biba bou di e “armoedegrens”. Aruba kier crea mas perspectiva pa su pueblo, y esey no ta un reto solamente pa Aruba, pero pa henter Caribe Hulandes den nos Reino,” Rosenmöller a declara.
Segun e presidente di KOREL, e conversacion a confirma cu tin un deseo comparti pa comunica mas claramente n’e pueblonan den Reino kico ta e balor real di e cooperacion entre e paisnan. “E esencia di nos reunion tabata: laga nos mustra mas claramente na nos pueblo kico por ta beneficioso pa nos tur den Reino,” Rosenmöller a bisa.
E politico hulandes a reconoce cu Aruba recientemente a experencia claramente e importancia di Reino durante e tension geopolitico den region cu Venezuela. “Durante e tensionnan cu Venezuela, Aruba a mira claramente e proteccion cu Reino Hulandes ta ofrece. Pero tambe nos na Hulanda mester reconoce cu nos por beneficia hopi di e conocemento y experiencia cu ta existi den Caribe Hulandes. Nos mester mira esey como un balor,” Rosenmöller a enfatisa.
Rosenmöller a expresa tambe cu e vision di Gabinete AVP-Futuro ta haya hopi comentario positivo entre miembronan di Eerste Kamer. “E vision di e Gabinete ta atrae hopi miembronan di Eerste Kamer. Naturalmente nos a haci preguntanan critico tambe, pero nos ta positivo riba e direccion cu Prome Minister Mike Eman apresenta,” el a indica.
Segun Rosenmöller, e bishita reciente di Prome Minister di Hulanda Rob Jetten siman pasa na diferente isla den Caribe Hulandes ta un señal politico importante di e importancia cu actual Gobierno Hulandes ta dunando n’e region. “Nos ta hopi positivo cu Prome Minister Jetten a bishita e parti caribense di Reino. Esaki ta un señal claro cu Caribe ta importante pa henter Reino,” Rosenmöller a bisa.
Aunke Rosenmöller a expresa optimismo riba e direccion economico di Aruba, el a enfatisa cu e lucha contra combati pobresa, mehora poder di compra, aumenta e salario minimo mester sigui ta un prioridad. “Mientras aproximadamente 45% di poblacion ainda ta biba bou di e “armoedegrens”, bo no por ta completamente satisfecho cu desaroyo di un pais. E porcentahe ey mester baha. Pero nos ta mira tambe cu Gabinete AVP-Futuro ta trahando duro riba esey,” Rosenmöller a conclui.
