Despues di tres dia exitoso di presentacionnan na varios scol, Cas di Cultura y Grupo di Teatro Senguene ta celebra orguyosamente e impacto continuo di e Little Stars Theater Festival y e produccion pa mucha di e aña aki, Hans y Gretita.
Prome cu e presentacion final di e festival cu lo tuma lugar den weekend, studiantenan di scolnan participante St. Paulus School, Colegio Santa Filomena Basis, y Scol Soeur Juliette a tuma parti den un “Tour di Little Stars,” treciendo e magia di teater directamente na scolnan basico rond Aruba. Riba 18, 19 y 20 di mei, cada scol participante a presenta no solamente pa nan skol, pero tambe pa studiantenan di diferente scol basico, creando un intercambio unico centralisa rond di creatividad, contamento di historia y expresion hubenil.
E miembronan jong di e elenco tabatin e oportunidad di presenta pa studiantenan di St. Paulus School, Colegio Santa Filomena Basis, Scol Soeur Juliette, Scol Caiquetio, Colegio Sagrada Curazon, Colegio Santa Teresita, Mon Plaisir San Nicolas, Reina Beatrix School, y Pius X School.
E iniciativa a resulta di ta un exito grandi, unda cu hopi mucha a experencia teater bibo na un manera atractivo y accesibel. Fuera di entretenimento, e proyecto tabatin como meta pa encurasha confiansa, teamwork, abilidadnan di comunicacion, y un aprecio creciente pa e arte di actuacion den e hobennan di Aruba.
Pa medio di programanan manera e Little Stars Theater Festival, Cas di Cultura, y Grupo di Teatro Senguene ta sigui cu nan mision di sembra amor pa teater — inspirando un generacion nobo pa conecta cu cultura y creatividad a traves di e poder transformativo di teater.
Ta encurasha publico pa sigui Cas di Cultura y Grupo di Teatro Senguene riba medionan social pa mas informacion tocante e evento final y actividadnan cultural venidero.
