Mientras cu menasanan riba internet, estafa via inteligencia artificial y atakenan digital ta sigui aumenta rond mundo, cybersecurity ta birando un topico urgente pa empresa, gobiernonan y comunidadnan den henter Caribe.
Diahuebs awo, dia 28 di mei, e prome edicion na Aruba di e Dutch Caribbean Cyber Conference lo tuma luga na Hilton Aruba. E evento ta completamente bendi caba, locual ta mustra e interes y preocupacion creciente rond di siguridad digital den e region.
E conferencia ta bin acerca un edicion exitoso na Corsou na aña 2025 y ta reuni profesionalnan di cybersecurity, lidernan di empresa y personanan cu ta tuma decision for di henter e region di Caribe Hulandes.
Cu e aumento lihe di inteligencia artificial, estafa via internet, atakenan di ransomware y dependencia digital, organisacionnan ta enfrenta retonan nobo cada dia. Hopi compania ta birando mas consciente cu cybersecurity no ta un asunto di IT so mas, sino algo cu ta afecta operacion, reputacion, finansa y confiansa.
E conferencia ta enfoca riba riesgonan real di cybersecurity, solucion practico y cooperacion regional. Oradornan fo’i Caribe y di exterior lo comparti conocemento riba e panorama digital cambiante y e importancia di resistencia digital.
Segun e organisadornan, e region Caribense ta birando mas conecta digitalmente, pero n’e mesun tempo mas vulnerabel pa cybercrimen y menasanan via internet. Eventonan manera esaki ta diseña pa crea mas conscientisa, stimula colaboracion y yuda organisacionnan prepara pa futuro.
E programa ta core aproximadamente fo’i 1:00 te cu 5:00 PM y ta termina cu un sesion di networking pa e asistentenan.
Cu su expansion pa Aruba, Dutch Caribbean Cyber Conference ta sigui crece como un plataforma importante pa conscientisa di cybersecurity y cooperacion den e region.
Conecta. Siña. Fortalese bo siguridad digital.
Mas informacion: https://tozetta.com/event-dutch-caribbean-cyber-conference-aruba-2026/
E Dutch Caribbean Cyber Conference Aruba ta organisa pa Tozetta, Thesys IT. Socionan principal di e conferencia ta Justspark y Conneqtid.
