ORANJESTAD – E mascarada a cay den e novela politico rond di e HOFA, y e biaha aki no ta un speculacion local, sino e propio Staatssecretaris Hulandes, Eric van der Burg, cu a pone e berdad riba mesa. Pa hopi tempo e oposicion y e criticonan a purba di tira tur culpa riba ex Prome Minister Evelyn Wever-Croes, alegando cu t’e a firma. Pero e declaracion oficial di Van der Burg a bolter cos: e persona responsabel cu a sinta negocia, debati, y firma e ley aki ta Ministro Plenipotenciario Gerlien Croes.
El’a bisa den un declaraion na EA NEWS: “HOFA is onderhandeld vanuit Aruba door de gevolmachtigde minister die er nu zit”, referiendo na Gerlien Croes.
Cu e declaracion aki di Eric van der Burg, e defensa di Gerlien Croes ta dal abao manera un patia berde. E pueblo awor por mira ken tabata tabata na stuur. Mientras Evelyn Wever-Croes a semper mantene cu el’a firma solamente un acuerdo pa habri e porta pa papia, e negociacion concreto y final a keda formalmente den man di Gerlien Croes.
Raad van Advies ta keha e negociacion: Tin fayonan constitucional
Loke ta haci e declaracion di e Staatssecretaris mas pisa y preocupante pa Aruba, ta e desaster cu a keda negocia. E Raad van Advies (RvA) di Aruba a cana drenta e debate y a desmantela e documento completamemte, notando un cantidad di fayonan constitucional grave y grandi (grovale fouten).
E irresponsabilidad aki ta bini structuralmente den dos punto crucial:
Firma ciego sin conseho: Gerlien Croes a basha su firma bou di HOFA sin spera e conseho debido di Raad van Advies. El’a negocia prome, firma, y ignorando e organo di screening di mas halto di nos pais.
Falta di respet pa e organo supremo: Cera un deal di e magnitud aki sin un base legal solido ta un muestra di con debil e negociacion ey a wordo hiba den nomber di Aruba.
Cero consensus: Parlamento a keda den scuridad total
E declaracion di Eric van der Burg ta confirma tambe un falta di respet total pa e democracia Arubano. Gerlien Croes a core firma un documento di tal kaliber, sin cu Parlamento di Aruba tabatin e minimo bista riba e textonan final.
Te dia de awe, Parlamento di Aruba NO a vota, ni a duna un aprobacion riba e materia aki. Con por papia de un ‘deal’ pa Aruba si e representantenan di pueblo no a wordo informa y a wordo laga un banda sin consensus?
E berdad a sali legalmente na cla
E wega di sconde tras di otro politico a caba. E declaracion di e propio top-oficial Hulandes, Eric van der Burg, ta duna e prueba indiscutibel: Gerlien Croes tabata e negociador principal responsabel. Su falta di tactica, su pura pa firma sin e conseho legal di Raad van Advies, y su decision di pasa asina un documento yen di fayo sin pasa den Parlamento ta un fayo politico iresponsabel. Aruba no por wordo representa door di negociacionnan cera den scondi cu ta hinca e soberania y legalidad di nos pais den peliger.
