Siguiendo e strategia pa un maneho sostenibel di instalacionnan deportivo na Aruba, Minister di Deporte, sra. mr. Gerlien Croes, ta reafirma cu e plan di accion pa mantencion ta continua firmemente.
E prome trabounan pa e aña aki a inicia cu mantencion integral di veld di Sabana Grandi, mientras cu trabounan tambe a wordo implementa na veld di Calbas, Duracell y Grasshoppers, como parti di un plan amplio pa mehora y mantene infrastructura deportivo rond di nos isla.
E trabou ta wordo ehecuta den colaboracion estrecho entre Ministerio di Deporte y Ministerio di Infrastructura, hunto cu Departamento di Obranan Publico (DOW). E ekiponan tecnico ta sigui traha di forma structural y periodico pa sigura cu veldnan y canchanan deportivo ta keda den condicion optimal pa uzo di comunidad y deportistanan.
E plan pa 2026 ta construi riba e base solido di e exito alcansa den 2025, unda mantencion sistematico a resulta den mehoracion concreto na varios facilidadnan deportivo.
Minister Gerlien Croes a enfatisa cu mantencion ta un pilar esencial pa desaroyo deportivo: “Mantencion ta clave pa sostenibilidad. Nos ta kere den deporte como un instrumento di desaroyo social y un estilo di bida saludabel. Infrastructura na bon condicion ta esencial pa logra esaki. Nos ta comprometi pa sigui traha cu transparencia, planificacion y eficiencia pa sirbi nos comunidad manera e merece”.
E continuidad di e plan ta enfoca riba implementacion di un sistema di mantencion preventivo y periodico, garantisando un uzo responsabel di fondo publico y maximalisando impacto positivo pa comunidad y deportistanan.
Minister Gerlien Croes a expresa su gradicimento na DOW y na tur colaboradornan cu ta contribui na e esfuerso aki, y a reafirma cu e ministerio ta comprometi pa amplia e programa di mantencion pa mas veldnan y facilidadnan deportivo durante 2026.
Cu e iniciativa aki, Gobierno di Aruba ta sigui inverti den un infrastructura deportivo duradero, accesibel y di calidad pa tur ciudadano.
