Durante un lectura diahuebs anochi na Vrije Universiteit Amsterdam, Prome Minister di Aruba mr. Mike Eman a presenta un vision pa un Reino Hulandes cu no solamente ta basa riba structuranan constitucional of arreglonan administrativo, sino riba un ideal comparti: e Bon Comun. Segun Eman, e reto mas grandi di nos tempo ta restablece sentido di pertenencia, significado y responsabilidad comparti den comunidadnan moderno.
Den su discurso, Prome Minister a argumenta cu e institucionnan, reglamentonan y procedimentonan ta indispensabel, pero no suficiente pa mantene comunidadnan hunto. El a indica cu tanto den Europa como den otro parti di mundo occidental, tin un creciente distanciamento entre ciudadano y e institucionnan publico, un desaroyo cu ta crea desconfiansa y fragmentacion social. “Personanan no solamente kier wordo gobierna. Personanan kier sinti cu nan ta pertenece na algo mas grandi cu nan mes,” Eman a expresa durante su presentacion.
Reino como comunidad di destino comparti
Eman a propone pa mira Reino Hulandes no solamente como un areglo constitucional entre e paisnan, pero como un comunidad cu ta comparte interesnan comun y un destino comparti. El a basa su argumento riba e preambulo di Statuut di Reino, caminda ta papia di “e interesnan comun di tur e partenan di Reino”. Segun Prome Minister, e concepto aki por forma e base pa un vision moderno di Reino, centra rib’e Bon Comun como principio orientador pa cooperacion futuro. “E momento a yega pa nos redescubri e significado profundo di e interesnan comun menciona den Statuut. No como un concepto juridico solamente, pero como un mision comparti pa crea bienestar, dignidad humano y oportunidad pa tur ciudadano den Reino,” Eman a indica.
Aruba como puente strategico den Atlantico
Durante su lectura, Eman tambe a enfoca riba e posicion unico di Aruba den un mundo cu ta cambia rapidamente. Segun dje, cambionan geopolitico, nobo rutanan comercial y e creciente importancia di Latinoamerica ta crea oportunidadnan nobo pa Reino Hulandes. “Caribe no ta djis e frontera final di Europa. E por bira e entrada di un horizonte nobo for di Atlantico,” Prome Minister a expresa. Como ehempel concreto di e potencial di cooperacion, Eman a menciona e Memorandum of Understanding firma recientemente tocante e facilidad di EU preclearance na Aruba, den cooperacion cu KLM y Royal Schiphol Group. Segun dje, e iniciativa aki no solamente ta fortalece conectividad entre Europa y Merca, pero tambe ta crea e oportunidadnan economico y strategico pa henter Reino.
Inversion den conocemento y innovacion
Un otro punto central den su discurso tabata e cooperacion cu Wageningen University & Research pa establece un centro di conocemento na Aruba. E proyecto aki ta enfoca riba tema manera seguridad alimentario, adaptacion climatico, maneho di awa y agricultura sostenibel den regionnan seco. Segun Eman, e verdadero valor di e cooperacion ta den e posibilidad pa hoben profesionalnan, investigadornan y emprendedornan di Aruba y Hulanda desaroya solucionnan innovador hunto. Como ehempel, el a destaca e proyecto di restauracion di coral “Turning the Tide”, un colaboracion entre University of Aruba, Aruba Conservation Foundation y Wageningen University & Research. “Lo cu ta desaroya na Aruba por contribui na solucionnan pa desafio mundial. Esey ta e esencia di e Bon Comun: no dependencia, sino creacion di balor comparti,” Eman a señala.
Un Reino cu ta inspira
Na final di su lectura, Prome Minister a enfatisa cu futuro di Reino no por sostene exclusivamente door di reglamento of mecanismo institucional. Segun dje, un comunidad fuerte bo ta construi riba speransa, significado y e conviccion cu futuro di un ta conecta cu futuro di otro.
“E Reino di futuro mester ta uno cu ta inspira. Un Reino unda e hobenan na Groningen y Aruba por sinti cu nan ta forma parti di algo cu ta mas grandi cu nan mes. Un Reino cu ta combina autonomia cu conexion, nos idealnan cu e institucionnan, y progreso cu dignidad humano.”
Cu e mensahe ey, Eman a haci un apelacion pa un renovacion di e vision di Reino, basa riba cooperacion, responsabilidad comparti y construccion di un “hogar comparti”, un concepto inspira door di e pensamento di e difunto rabino y filosofo Jonathan Sacks.
Segun Prome Minister, e mision di nos generacion ta cla: construi hunto un Reino cu ta guia door di e Bon Comun y cu ta ofrece un futuro comparti pa tur su ciudadanonan.
