Comision di Desaroyo y Bienestar di Bario Mabon, hunto cu Fundacion Luna, a realisa un recorido den Bario di Mabon pa observa y atende e problematica di cacho den comunidad.
E iniciativa aki a nace despues cu e Comision a nota con, durante diferente Accion di Bario cu Prome Minister Mike Eman, den colaboracion cu organisacionnan manera Fundacion Luna a yuda atende problema relaciona cu bienestar di bestianan den diferente bario. Inspira pa e ehempel positivo aki, Comision di Bario Mabon a tuma e iniciativa pa traha hunto cu Fundacion Luna pa atende e situacion di cacho den e bario.
E Comision ta di opinion cu hopi biaha tin e percepcion cu solamente durante bishitanan di Prome Minister Mike Eman un fundacion manera Fundacion Luna por yega den un bario. Sin embargo, esaki no ta asina. Cada bario por tuma su propio iniciativa y sigui e ehempelnan positivo promovi pa crea miho condicion pa nan habitantenan.
Durante e Conferencia di Bon Comun organisa pa Prome Minister Mike Eman, presidente di Comision di Bario Mabon, Astrid Vries, a firma un Memorandum of Understanding (MoU) hunto cu e miembronan di e comision. Cu esaki, e comision a compromete su mes pa no solamente organisa actividadnan den e bario, pero tambe pa traha riba desaroyo di comunidad y atende diferente reto cu e bario ta confronta diariamente.
Comision di Bario Mabon a informa Zoey Konijn di Fundacion Luna tocante diferente area den e bario unda cachonan ta stroba habitantenan ora di pasa riba caminda y ta crea preocupacion pa siguridad y bienestar di e habitantenan.
Zoey Konijn di Fundacion Luna a comparti cu e recorido tabata un bon oportunidad pa cana den Bario Mabon hunto cu representantenan di e comunidad. Segun Konijn, loke mas a resalta tabata cu tin un necesidad real di sosten ora ta trata di cachonan cu ta biba riba caya. Hopi di e cachonan aki un tempo tabatin un doño, pero awor ta biba sin cuido, siguridad ni cas adecuado.
Fundacion Luna tambe a tuma nota cu hopi cacho ta biba na cadena. Pa medio di educacion, compasion y sosten, e fundacion ta kere cu poco poco por yuda cambia e mentalidad aki. Algun famia tambe mester di un espacio mas apropia pa nan bestianan, y caminda ta posibel, Fundacion Luna kier yuda mehora e situacionnan ey.
Loke mas a conmove Fundacion Luna tabata e forma cordial cu hopi habitante di Mabon a ricibi e iniciativa pa traha hunto riba bienestar di tanto hende como bestia.
Fundacion Luna su siguiente campaña di sterilisacion y castracion den luna di juni lo ta specialmente dirigi na famianan “pariba di brug” cu mester di asistencia den cuido di nan bestianan di cas. Fundacion Luna ta kere firmemente cu esaki mester ta un esfuerso di comunidad, pasobra ora hende haya sosten y bienestar, nan bestianan tambe ta beneficia.
Pa Comision di Desaroyo y Bienestar di Bario Mabon, e presencia di Fundacion Luna tambe a sirbi como un experiencia educativo unda nan a haya mas conocemento riba problematica di cacho y solucionnan cu por yuda e comunidad.
Comision di Desaroyo y Bienestar di Bario Mabon ta sigui traha pa un bario mas sigur, limpi y miho convivencia pa tur habitante.
