Copa Noord 2026 organisa e aña aki pa Calabas Blue Jays dedica na (5) Baluarte Lea Tromp, Maria Boekhoudt, Aldrin Boekhoudt, Julieta (Jeta) de Cuba Lenin Ashby a continua cu varios partido.
Kudawecha Indians ta derota Bad Boys:
Kudawecha Indians kendenan e aña aki a bin cu un idea serio pa duna tur ekipo dolor di cabes a knock out Bad Boys den un forma brutal cu score di 23-9. Kudawecha Indians ta anota 2 careda den prome inning ta amplia cu dos mas den di dos inning y ta pusha 4 careda mas den di tres inning pero ta start un fiesta di careda anotando 13 den di 5 inning. Bad Boys ta purba keda den wega anotando 4 careda den di tercer entrada y 2 den 4 mas 2 den bom di 5 inning pero no por a responde e atake ofensivo di Kudawecha Indians. Boxscore final Kudawecha Indians 23 careda, 25 hit, 1 error. Bad Boys 9 careda, 11 hit, 2 error. Melchor Abreu ta cubri henter e ruta y ta pone e victoria riba su nomber. Chomon Boekhoudt tambe ta bay henter e ruta y ta bay cas cu un macuto di careda mas e derota riba su nomber. Pa Kudawecha Indians a destaca na bate Ricardo Pelayo y Edmar Lampe ambos di 5-5 y tabata imparable ambos cu un cuadrangular, ademas Pelayo a impuha un total di 7 careda, A. Webb di 5-4, G.Tromp di 5-3, y Echi Boekhoudt y Jowald Croes ambos di 4-3. Pa Bad Boys a luci na plato den causa perdi C. Offerman 3-3, J.Quandt y V. Paredes di 2-1, R.Samson 3-2. Asina Kudawecha Indians a pone nan prome victoria di Copa Noord 2026 riba nan nomber saliendo riba bon pia.
Kudawecha Redskins ta soda hopi pa derota Stingers 9-5
Kudawecha Redskins kendenan tin bin di nan prome derota contra Royal Power tabata tin mester di nan prome victoria den Copa Noord 2026. Esaki sinembargo no a bay fasil y mester a traha duro contra e muchanan di Stingers kendenan ta keda un ekipo luchador y peligroso. Stingers ta pika bay ariba 5-0 den bom di prome inning. Redskins ta rally den di dos inning pa empata e wega 5-5. Wega ta keda asina te den cabez di 6 inning momento cu Redskins ta bolbe rally pa 4 careda pa logra nan prome victoria. Kudawecha Redskins 9 careda, 9 hit, 1 error lagando 5 coredor na base. Stingers 5 careda, 8 hit, 0 error y ta laga 6 coredor den circulacion. Zavala kende ta drenta releva Maduro den prome inning ta seya e victoria riba su nomber. P.Mauricia kende ta ricibi relevo den di 6 inning for di L. Henriquez ta bay cas cu e derota . Mihor bateadornan pa Kudawecha Redskins a resulta Jayson Orman 2-1, Jefraim Leon di 4-2, J.Pimienta di 3-2 y Richinel Matos di 1-1. Pa Stingers a destaca na plato M.Halley, Jourick Blanco y P.Mauricia tur di 2-1, D.Lynch a bay di 3-2. Weganan di Copa Noord 2026 ta continua diabierna y diasabra riba veld di Centro di Bario Noord y diadomingo riba veld di Calabas Blue Jays.
