Presidente di Parlamento di Aruba, Marlon Sneek, ta invita tur ciudadano di Aruba pa nomina hoben ehemplar y talentoso pa e Premio Hala di Shoco di Parlamento 2026.
E Premio Hala di Shoco ta un reconocimento especial cu Parlamento di Aruba ta entrega na hoben cu, door di nan liderazgo, dedicacion y aportacion positivo, ta sirbi como ehempel inspirador pa otro hoben y pa comunidad.
E Hala di Shoco ta simbolisa hubentud cu sabiduria, ambicion y liderazgo. Cu e premio aki, Parlamento di Aruba kier honra hoben cu a contribui significativamente na desaroyo di nos comunidad y nos pais.
Ciudadanonan por entrega nan nominacion door di uza e QR code of link cu ta disponibel riba e pagina di facebook di Parlamento y tambe riba e website entre 3 di juni 2026 te cu 3 di juli 2026. Parlamento ta haci un yamada especial na scolnan, organisacionnan no gubernamental y otro institucionnan cu ta traha cu hoben pa nomina hoben talentoso cu nan ta considera como bon ehempel pa otro.
Pa cualifica pa e Premio Hala di Shoco, e nominado mester cumpli cu e siguiente criterianan:
* E nominado mester tin nacionalidad Hulandes y/of a biba na Aruba pa un periodo continuo di minimo 10 aña y tabata registra na e registro civil durante e periodo aki.
* E nominado mester tin entre 15 pa 24 aña.
* E nominado mester a aporta na desaroyo di comunidad y pais.
* E nominado mester a demostra capacidad di liderazgo y habilidad pa motiva otro hende.
* E aportacion y logronan mester a tuma luga den e ultimo cinco añanan.
* E contribucion mester a wordo haci den capacidad personal y no como funcionario di gobierno nombra of eligi.
Proceso di seleccion
Un comision consistiendo di un Miembro di Parlamento di cada fraccion representa den Parlamento lo evalua tur nominacionnan y selecciona tres finalista.
Durante e reunion di seleccion, tur Miembro di Parlamento lo scoge e ganador di e Premio Hala di Shoco di Parlamento basa riba e recomendacionnan di e comision.
Tradicionalmente, e premio ta wordo entrega durante e Apertura di Aña Parlamentario na e hoben ganador.
Presidente Marlon Sneek a enfatisa cu Aruba tin hopi hoben cu talento, perseverancia y deseo sincero pa contribui positivamente na sociedad. “Cu e Premio Hala di Shoco nos kier pone den centro di atencion e hobenan cu ta haci diferencia y cu ta inspira otro pa sigui nan soño y traha pa un mihor Aruba,” asina Sneek a declara.
