Den preparacion pa e proximo temporada di orcan, e destacamento di Marina di Sint Maarten a participa na Caraïbes ‘26 siman pasa. Esaki ta un ehecicio bienal, na gran escala den Caribe. E ehecicio, organisa pa Fransia, ta enfoca riba yudansa humanitario y operacionnan di yudansa den calamidad.
Durante e di dos fase di Caraïbes, e Mariniernan di Sint Maarten a participa activamente. E entrenamento tabata basa riba un scenario realistico: un orcan devastador a asota e parti Frances di Sint Maarten. Den cooperacion cu trupanan Frances y Colombiano, e Mariniernan di Sint Maarten a localisa e residentenan (simula) y a evacua nan pa un area sigur; tanto e barconan rapido FRISC como un helicopter Frances a keda desplega pa transporta e heridonan rapido y sigur.
Danki na e bon cooperacion entre Marina, e forsanan arma Frances, e unidad Colombiano, y e otro partnernan internacional, e evacuacionnan di ehecicio a keda realisa exitosamente. Durante e entrenamento, tur participante a comparti informacion, a sostene otro durante transporte, y conhuntamente a cuida e victimanan (simula).
Cada dos ana, Caraïbes ta reuni varios pais y partnernan local di Caribe pa fortalece e preparacion pa yudansa humanitario y reacciona riba calamidad den e region. E ehecicio ta provee un ambiente realistico den cual conocemento y habilidadnan ta wordo intercambia y desaroya mas aleu.
