Desaroyonan rond di e seleccionnan nacional y e preparacionnan final p’e Campeonato Mundial di Futbol 2026 ta den ful swing. Entre e noticianan mas destaca, e delantero di e seleccion di Corsou, Jürgen Locadia, a ricibi un sancion cu ta afecta directamente e partido amistoso contra Aruba diadomingo awo.
Locadia a mira carchi cora directo durante un partido di fogeo contra Escocia, caminda Corsou a sufri un derota di 4-1. Despues di e decision di e organo disciplinario, a keda confirma cu e hungado ta suspendi pa un solo partido amistoso. Esaki ta nifica cu e delantero lo no por hunga contra Aruba, pero e si lo ta completamente habilita pa debuta den e prome partido di Corsou den e Copa de Mundo contra Alemania. Locadia a haya e castigo aki despues di un accion peligroso caminda el a dal un hungado Escoces cu su elleboog den cara.
Alemania golpia pa lesion
Un di e noticianan mas fuerte den e campamento Aleman ta cu e delantero talentoso di 18 aña di Bayern München, Lennart Karl, a keda oficialmente for di e Mundial. Federacion Aleman a confirma cu e hungado a sufri un dechira muscular durante e training prome cu e amistoso contra Merca. Su luga lo wordo tuma pa Assan Ouédraogo di RB Leipzig. Entrenado Julian Nagelsmann a lamenta e baha aki, asina cerca di e inicio di e torneo.
Di otro banda, den e seleccion di Brasil tin preocupacion pa Neymar. E as di 34 aña, hungado di Santos FC, lo somete su mes na un MRI-scan pa evalua un problema na su kuit di su pia drechi. Entrenador Carlo Ancelotti tin speransa cu si e resultadonan ta positivo, e goliador historico lo por join e trainingnan regular otro siman.
Medidanan di FIFA y bofta pa e fanaticonan
FIFA a topa cu basta critica despues di a declara invalido e carchinan di mas of menos 60 fanatico cu, pa motibo di un fayo den e sistema digital di benta, a logra adkiri esakinan gratis. E federacion internacional a pidi disculpa pa e inconveniencia, pero a exigi cu e fanaticonan mester paga e prijs corecto pa mantene nan reservacion pa e partidonan na Toronto, Canada.
Ademas, FIFA a anuncia cu nan lo prohibi entrada di vuvuzela, fluit y cualkier otro aparato cu ta haci desordo den e stadionnan, recordando e polemica di Mundial 2010. Tambe, pa motibo di siguridad, no lo permiti boter di awa cu por bolbe yena, aunke cu expertonan a spierta riba e peliger di e calor extremo den e stadionnan cu no tin dak.
Preparacionnan di Hulanda y otro seleccionnan
E seleccion di Hulanda (Oranje) a yega New York pa cuminsa nan training den e zona di Orangeburg. Prome cu e practica, e hungadornan a tene un momento di silencio pa e fayecimento di e ex-team manager Hans Jorritsma, kende a muri na edad di 77 aña. E asistente tecnico Ruud van Nistelrooij lo join e ekipo mas despues pa motibonan priva.
Mientras tanto, e seleccion di Iran a ricibi formalmente nan visa pa drenta Merca, locual ta garantisa nan transporte for di nan base di entrenamento na Mexico pa e partidonan oficial.
Pa duna bida na e fiesta, a confirma cu e cantante Colombiano Shakira lo ta e encarga principal di e ceremonia di apertura den e Stadion Azteca na Mexico, compartiendo escenario cu J Balvin, Tyla y Burna Boy.
