Cada dia cu Crisisteam keda terco y cu comportacion di “mucha mal cria”, mas famia ta bira victima di un maneho inhumano y unda hende ya no ta central mas, pero ta wordo ofendi y maltrata manera cacho.
SOLO DI PUEBLO a haci un investigacion recientemente unda nos tuma contacto cu RIVM na Hulanda pa asina double check kico ta e procedura pa un entiero na Hulanda.
Nos a conversa masha ameneno cu un medewerker cu a suministra nos tur informacion bao anonimidad y manda nos e ultimo protocol di 25 febuari 2021, unda el’a bisa nos cu ora un persona fayece, e virus tambe ta desparce. Dor cu e virus solamente ta wordo traspasa via ‘scupi’ of ‘niester’ of ‘tosamento’, ta haci cu un persona cu fayece lo no por plama contagio. Asina mes a implementa varios protocol con pa atende cu un fayecido, pa asina tene extra cautela. E guia di RIVM ta bisa: “SARS-CoV-2 is een virus dat van mens op mens overgebracht wordt door besmette druppels die vrijkomen bij hoesten en niezen en (direct) contact. Dit vormt na overlijden geen risico meer.””
E trahador di RIVM cu a referi nos a e ultimo protocol pa entiero, fecha dia 25 di febuari 2021, cu ta ratifica y reconfirma tur e protocolnan promer, unda un entiero ta tuma lugar normal, esta caha por ta habri, famia por despedi, y TAMBE por hiba e caha cas, of na e sitio di entiero.
Pa kita tur duda: “De overledene mag zowel thuis als in het uitvaartcentrum opgebaard worden. De kist mag zowel open als dicht. Er is geen bezwaar tegen opbaring van de overledene op bed met koeling middels een bedkoelsysteem (dit systeem wordt veelvuldig in de thuissituatie en in zorginstellingen voor langdurige zorg zoals verpleeghuizen toegepast).”
E trahador di RIVM a keda masha sorprendi mes, cu na Aruba, Gobierno ta kita e derecho sagrado di famianan pa despedi di nan ser keri. E trahador a bay mas leeuw pa informa, cu te hasta prome cu e persona fayece (na hospital), e famianan cercano tin derecho pa acudi na hospital y bishita nan ser keri den e ultimo oranan.
Cu e ultimo publicacion di RIVM, fecha dia 25 di Febuari 2021, nos por proba cu Crisisteam, encabesa pa Rino Hermans y varios otro personanan di otro departamentonann, ta cometiendo un abuso, cu nan no por substancia.
PA TUR COS ARUBA TA SIGUI REGLA DI RIVM:
Nos tin un aña ta tende tur di nan di Crisisteam ta menciona, cu tur cos ta wordo sigui for di RIVM, cu regularmente ta reuni cu DVG, entre otro Sra. Sharline Koolman. RIVM su maneho ta totalmente central pa Reino Hulandes, y Aruba ta directamente mara na RIVM.
Den caso di vacuna, hasta RIVM a bini Aruba pa inspecciona y certifica e procedura. Ora ta trata di un entiero, e cos ta cambia, pasobra aki no kier sigui RIVM, pero ta sigui algun experto Arubiano cu a chupa cos di nan duim y kier impone, dicta, strangula famianan, for di nan ser keri. Crisisteam no tin ningun estudio haci, ningun prueba, ningun documentacion unda nan por basa nan desicion inhumano ( traha hende manera cacho), pa asina impedi famianan pa haci un entiero digno.
Dia 3 di maart ultimo, nan a publica pa prome biaha, cu entiero mester bay cera, y cu nan ta keda firme riba nan desicion (terco) pa complace e autor di e regla aki, esta Aurora.
ROBES Y NO KIER BAHA CABES:
Esaki ta tipifica hendenan terco. Hendenan cu tur hende por constata cu nan ta robes, pero nan no kier baha cabes. Diripiente nan kier inventa tur sorto di escusa. Diripiente sea ta Crisisteam, Rino Hermans o Sharline Koolman tin mas informacion di Covid-19 cu RIVM na Hulanda. Ora nan no sa con pa scapa nan cara di e abuso cometi (violacion di derecho humano!) contra hopi famia na Aruba, enbes di corigi e situacion, pidi disculpa, y cuminza trata hendenan na forma digno, awor nan kier keda actua den error. Cu ki meta? pa siribi interes di ken? Sigur no esun di pueblo.
