Diaranson Minister di Finansa, Asunto Economico y Sector Primario mr. Geoffrey Wever a reuni cu Directie Financiën, Departamento di Impuesto, Departamento di Aduana y Departamento di Asunto Economico, Comercio y Industria tocante e impactonan di e desaroyonan economico y geopolitico riba entradanan di gobierno y e cuadro financiero pa 2026.
E reunion tin como meta banda di evaluacion di entradanan di gobierno den e prome lunanan di 2026, tambe premira, adresa y mitiga posibel factornan y riesgonan cu por influencia entradanan di gobierno y desaroyo economico pa e resto di 2026. Banda di reuni semanalmente cu cada departamento, cada kwartaal den cuadro di monitor y ta “in control” lo reuni cu Directie Financiën, Departamento di Impuesto, Departamento di Aduana y Departamento di Asunto Economico, Comercio y Industria. Comunicacion entre departamentonan menciona ta esencial den ehecucion di maneho financiero y economico. Maneho financiero ta bai man den man cu maneho economico.
E rol di cada departamento ta uno importante. Mientras Departamento di Impuesto y Departamento di Aduana hunto ta responsabel pa 90 porciento di entradanan di gobierno, Departamento di Impuesto tambe tin e tarea di procesa entrada di toeristenheffing pa ATA, primanan destina pa SVb y AZV, y BAZV pa AZV. Desaroyo di Aruba su economia ta un di e factornan determinante riba entradanan manera entre otro loonbelasting, bbo, winstbelasting, toeristenheffing, y invoerrechten, pero tambe primanan destina pa SVb y AZV, y BAZV pa AZV.
Pa por proyecta loke gobierno por bay ricibi na entrada, ta haci uzo di proyeccion economico di Departamento di Asunto Economico, Comercio y Industria. Directie Financiën tin entre otro e tarea di monitor e cuadro financiero y cu presupuesto di Pais Aruba keda cumpli cu normanan di presupuesto manera ancra den ley di supervision financiero.
Cifranan preliminario te cu luna di april 2026 di Departamento di Impuesto ta mustra un crecemento Afl. 13,5 miyon florin compara cu e mesun periodo di 2025. Pa Departamento di Aduana e cifranan preliminario tambe ta mustra un crecemento den e prome cuatro luna di 2026 di Afl. 5,8 miyon compara cu e mesun periodo di 2025. Te cu april 2026, resultado preliminario ta mustra cu gobierno a ricibi 31 porciento di e total di entradanan cu Departamento di Impuesto y Departamento di Aduana tin presupuesta pa 2026.
Pa lunanan venidero, e duracion di e guera na Medio- Oriente y e habrimento di e Estrato di Hormuz riba prijsnan di petroleo y productonan petrolero ta keda un riesgo riba Aruba su economia y entradanan di gobierno. Den e ultimo proyeccion economico di Departamento di Asunto Economico, Comercio y Industria ta premira cu Aruba su economia lo surpasa Afl. 8 biyon florin den 2026. E proyeccionnan economico ta posibel danki na e dialogo continuo cu diferente instancianan y expertonan local, y a base di analisis di diferente desaroyo. E Comision MacroModel ta reuni pa intercambio di informacion, analisis y evaluacionnan di e suposicionnan. Miembronan di e Comision MacroModel ta Directie Financiën, Impuesto, ATA, AHATA, AAA, SVB, AZV, DAO, CBA y DEACI como voorzitter.
Den cuadro di monitor, indicadornan di actvidad economico ta mustra un desaroyo positivo. Cantidad di stayovers tourists a crece te cu luna di april cu 9.6 porciento compara cu e mesun periodo di aña anterior. E cantidad di relacionnan di trabao ta crece cu 2,793 di 48,083 den januari pa 50, 876 mientras e cantidad di dunadornan ta mustra un crecemento di 223, di 3,976 den januari pa 4,199 den juni segun cifranan oficial di SVb. Te cu april, CBS ta indica un inflacion di 0.2 porciento.
Minister Geoffrey Wever ta gradici Directie Financiën, Departamento di Impuesto, Departamento di Aduana y Departamento di Asunto Economico, Comercio y Industria, departamentonan clave den ehecucion di Aruba su maneho financiero y maneho economico.
