Tropical Bottling Company orguyosamente ta anuncia cu specialmente pa e temporada di futbol mundial, cu a introduci cuater diferente diseño riba nan blekinan di Coca-Cola. E campaña ta carga e nomber di “Coca-Cola FIFA Country Cans” y ta pa un tempo limita.
A scoge cuater pais di cual tin hopi fanatico na Aruba. Ta trata aki di Brazil, Colombia, Hulanda y Corsou. E blekinan cu diseño special di e paisnan participando den e campeonato mundial di futbol lo ta obtenibel desde otro siman den supermercadonan na Aruba, pa un tempo limita durante luna di juni y tanten cu tin den stock.
Ta bon pa agrega cu pa Tropical Bottling Company ta un honor pa tin e diseño di nos isla ruman Corsou. E ta un forma pa rindi honor na e seleccion di Corsou y pa henter e pueblo di Corsou. Cu e blekinan aki di e refresco mas bendi na mundo y na nos islanan den Caribe Hulandes por sirbi como un apoyo moral pa e seleccion nacional cu lo saca nos cara den e campeonato aki.
Tocante Tropical Bottling Company
Tropical Bottling Company, un subsidiario di MetaCorp, e empresa mas bieu di Aruba, a nace na aña 1948 den Wilhelminastraat, banda di unda awe ta El Gaucho Restaurant. E tempo ey e planta tabatin un capacidad pa yena 10 boter di refresco pa minuut. E planta ta situa awo na Balashi y ta conta riba un capacidad pa yena mas o menos 1250 boter, bleki of boter di plastic pa minuut.
Awendia, separa di Coca Cola, e planta ta produci un cantidad di producto, manera Fanta, Schweppes, Dasani y mas. Tambe a añadi marcanan di bebida, manera Dewars, Bacardi, Grey Goose y hopi mas tambe cu ta resorta bou di nan maneho.
Orguyosamente por menciona cu tur producto di bleki di e liña Coca Cola y Fanta bendi den e islanan ABC ta produci den e planta di Tropical Bottling na Aruba.
Den añanan 90 a lansa Awa, cu a bira asina exitoso, te cu The Coca Cola Company mes a opta pa tum’e over y hacie “Dasani by Awa” …un desaroyo cu Aruba por ta orguyoso di dje!
