Durante un bishita oficial na Parlamento Europeo, un delegacion di Parlamento di Aruba, encabeza pa Presidente di Parlamento Marlon Sneek, a sostene diferente reunion importante cu representantenan Europeo. Un di e encuentronan principal tabata cu europarlamentario Marit Maij, miembro di Parlamento Europeo pa Hulanda, kende ta demostra un interes special den e pais y teritorionan Caribense di Reino Hulandes.
Durante e reunion, e participantenan a intercambia informacion y idea tocante diferente oportunidad cu Union Europeo ta ofrece na Aruba y otro Pais y Territorio Ultramar (OCTs). A dedica atencion special na e posibilidadnan cu programanan Europeo por brinda.
Un di e temanan central den e dialogo tabata Erasmus+, un di e programanan mas conoci di Union Europeo. E iniciativa aki ta ofrece oportunidad pa studiante, docente, profesional y institucionnan educativo participa den intercambio internacional, entrenamento profesional, colaboracion academico y desaroyo di competencianan profesional y personal.
Segun Presidente Marlon Sneek, e reunion a confirma cu Aruba tin acceso na diferente instrumento di cooperacion y financiamiento cu ainda por probecha mas ampliamente. “Aruba tin hopi potencial pa beneficia di programanan europeo. E encuentro aki a mustra cu tin oportunidadnan concreto den area di educacion, innovacion, investigacion y desaroyo humano. Nos mester sigui traha pa aumenta conocemento y acceso na e recurso nan aki,” Sneek a declara.
Durante e intercambio, europarlamentario Marit Maij a enfatisa e importancia di fortalece e visibilidad di e Pais y Territorio Ultramar den e proceso di decision europeo. El a señala cu Aruba, Corsou, Sint Maarten y e otro territorionan Caribense mester sigui laga nan voz resona y probecha di e oportunidadnan cu Union Europeo tin disponibel.
Recentemente, Maij a presenta preguntanan formal den Parlamento Europeo tocante e posicion special di Aruba, Boneiro y Curaçao den e contexto europeo. Segun e, ta importante cu mas organizacion, institucion educativo y hoben di e region conoce y uza e posibilidadnan di cooperacion y financiamento cu Europa ta ofrece.
Durante e reunion tambe a discuti otro programanan importante manera Horizon Europe, enfoca riba investigacion y innovacion, y LIFE, cu ta brinda apoyo pa proyectonan relaciona cu medio ambiente, sostenibilidad y accion climatico.
Presidente Sneek a destaca cu Aruba ya ta participa exitosamente den diferente proyecto europeo durante e ultimo añanan, pero cu ainda tin espacio considerabel pa amplia e participacion y aumenta e beneficio pa nos comunidad.
“Contacto directo cu representantenan Europeo ta esencial pa sigura cu Aruba ta mantene informa, conecta y representa den e espacionan caminda ta tuma decisionnan importante. E dialogo cu señora Maij a habri porta pa colaboracion futuro y pa un miho acceso na oportunidadnan cu por beneficia nos hobennan, nos institucionnan y nos comunidad,” Sneek a indica.
Segun e Presidente di Parlamento, e bishita ta forma parti di un strategia mas amplio pa fortalece e relacion entre Aruba y Union Europeo, promoviendo intercambio di conocemento, cooperacion internacional y acceso na recursonan cu por contribui na desaroyo economico, educativo y institucional di nos pais.
“Den un mundo cada bes mas interconecta, Aruba mester sigui busca alianza, conocemento y oportunidadnan cu ta fortalece nos posicion internacional y crea mas posibilidadnan pa futuro generacionnan,” Sneek a conclui.
