Durante un bishita oficial na Parlamento Europeo na Bruselas, parlamentario Jennifer Arends-Reyes, presidente di Comision di Relacionnan di Reino y Relacionnan Exterior di Parlamento di Aruba, hunto cu e delegacion di Aruba, a sostene un encuentro constructivo cu europarlamentario Marit Maij y su asesor politico Kenville Kleinmoedig.
E reunion a ofrece un oportunidad importante pa intercambia idea tocante e relacion entre Aruba, Reino Hulandes y Union Europeo, cu enfasis particular riba e posicion special cu Aruba ta ocupa como Pais den Reino y como Overseas Country and Territory (OCT) asocia cu Union Europeo.
Segun Arends-Reyes, Aruba mester sigui busca mas cooperacion, conexion y oportunidadnan concreto cu institucionnan Europeo pa fortalece e desaroyo sostenibel di nos pais.
“Aruba no mester mira Europa solamente como un socio historico, pero tambe como un socio estrategico cu por contribui na e desaroyo di nos economia, nos capital humano y nos capacidad institucional. Tin oportunidadnan importante cu nos mester sigui explora y probecha,” Arends-Reyes a declara.
Durante e encuentro a discuti diferente instrumento financiero y programa di cooperacion cu Union Europeo ta pone disponibel pa Paisnan y Teritorio Ultramar. Entre e areanan identifica como prioritario pa Aruba ta sostenibilidad, energia renovabel, educacion, innovacion, turismo duradero, digitalisacion y capacitacion di nos hubentud.
Arends-Reyes a enfatisa cu fondonan europeo por desempeña un papel importante den financia proyectonan cu ta fortalece resiliencia di Aruba pa enfrenta retonan actual y futuro.
“EU funds por bira un instrumento valioso pa Aruba. Nos ta papia di inversion den infrastructura resistente contra cambio climatico, maneho di awa, energia renovabel, modernisacion di servicio publico, formacion tecnico y oportunidadnan pa emprendedornan chikito y mediano. Tur esaki ta contribui directamente na construccion di un Aruba mas fuerte y competitivo,” el a señala.
Segun e lider di fraccion AVP, Aruba tin e potencial pa fortalece su posicion internacional door di sirbi como un brug natural entre Europa, Caribe y Latinoamerica. “Aruba tin hopi potencial, pero pa logra esaki, nos mester ta proactivo, presenta proyectonan bon prepara y busca alianza cu partnernan strategico den Parlamento Europeo y den otro institucionnan Europeo,” Arends-Reyes a expresa.
E encuentro cu Marit Maij y Kenville Kleinmoedig ta forma parti di e compromiso continuo di e delegacion pa fortalece diplomacia parlamentario y amplia e acceso di Aruba na oportunidadnan internacional. Segun Arends-Reyes, dialogo directo cu representantenan Europeo ta esencial pa percura cu e necesidadnan, reto y aspiracionnan di Aruba ta keda visibel den e scenario Europeo.
“Si nos kier logra resultado, nos mester ta presente caminda ta tuma decision. E tipo di encuentro ta habri porta, crea relacionnan y aumenta e posibilidad pa Aruba participa activamente den iniciativanan cu por beneficia nos pueblo,” el a indica.
Arends-Reyes a conclui reafirmando cu su meta principal ta pa cooperacion cu Union Europeo produci resultado concreto pa Aruba. “Nos no kier pa cooperacion internacional keda solamente riba papel. Nos kier mira resultado tangibel pa nos comunidad, pa nos emprendedornan, pa nos studiantenan y specialmente pa e siguiente generacionnan di Aruba. Esaki ta e direccion cu nos mester sigui construi hunto,” Arends-Reyes a conclui.
