E Campeonato Mundial di Futbol 2026 a ranca sali oficialmente cu un combinacion di espectaculo cultural, musica di nivel internacional y hopi drama riba tereno den e prome partidonan celebra na Mexico. Sinembargo, e gran fiesta deportivo aki ta bin compaña pa un fuerte preocupacion social na Merca, caminda miles di fanaticonan indocumenta ta biba cu e temor di wordo deporta si nan ta acerca e stadionnan.
Un inicio excitante riba y pafo di tereno
E fiesta mundialista a cuminsa na e iconico Estadio Azteca na Ciudad de Mexico, caminda a tuma luga e prome ceremonia di apertura. E presentacion musical a bin compaña p’e debut di e himno oficial “Dai Dai”, interpreta pa e strea Colombiano Shakira hunto cu e Nigeriano Burna Boy. Tambe a subi scenario artistanan renombra manera Belinda, J Balvin, e banda Maná y Alejandro Fernández, den un evento cu a celebra e herencia cultural y e union di e paisnan anfitrion.
Riba tereno, e accion a priminti un torneo vibrante:
- Mexico 2 – 0 Sur Africa: E pais anfitrion a haya un inicio espectacular dilanti di mas di 80,000 fanatico na Estadio Azteca. Julián Quiñones a habri e scoreboard trempan na di 9 minuut di partido, y Raúl Jiménez a sigura e victoria cu un gol cu un cabesaso den e di dos tempo (minuut 66). E partido a finalisa cu un total di tres carchi cora despues di decisionnan tenso, laga Sur Africa cu shete hungado riba tereno pa motibo di expulsion di Sphephelo Sithole y Themba Zwane, mientras cu e capitan Mexicano César Montes tambe a ricibi carchi cora den e minuutnan di descuento.
- Sur Corea 2 – 1 Republica Checa: Den e di dos encuentro di dia, celebra na Guadalajara, e ekipo Asiatico a logra un rebound den e di dos mita. Republica Checa tabata dilanti cu gol di Ladislav Krejčí na di 58 minuut, pero Sur Corea a reacciona fuertemente cu golnan di Hwang In-beom (minuut 66) y Oh Hyeon-gyu (minuut 79) pa asina bay cu e tres puntonan.
E realidad tristo di e migrantenan indocumenta
Mientras e fanaticada ta celebra, e realidad pa hopi bishitante y residente na Merca ta completamente diferente. E soño di ful un bida di José, un migrante Mexicano, tabata pa asisti na un partido di un Mundial di futbol. Ora el a haya sa cu Los Angeles lo alberga varios encuentro, el a ilusiona su mes cu e posibilidad di cumpli e soño aki, pero su situacion migratorio a mare den e realidad: “Lo mi tin cu wak nan na television”.
E homber di 46 aña, kende ta identifica su mes unicamente cu su nomber pa temor n’e autoridadnan migratorio, ta conta cu e ta fantico di futbol desde cu e tin memoria. E ta bisti e jersey di e seleccion Mexicano cada bes cu e por, y un di e mayor regalonan cu el a haci na su mes tabata pa asisti na un partido di ‘El Tri’ na Los Angeles, e ciudad caminda el a migra mas di 25 aña pasa.
“Bay stadion ta un emocion cu no tin comparacion”, José ta conta. P’e motibo aki, el a cuminsa spaar desde hopi aña pasa pa wak si e por a cumpra por lo menos dos ticket, un p’e y un pa su yiu homber di 10 aña, pa bay na un encuentro di Mundial, maske no tabata un partido di e seleccion di Mexico. Sinembargo, su soñonan a cay na awa pa motibo di e probabilidad cu e agentenan di e Servicio di Control di migracion y Aduana (ICE) lo ta presente den e stadionnan.
“Mi sa cu nan no lo pidi papel na tur e fanaticonan cu ta asisti, pero mi ta sigur cu nan lo bay pa esnan cu tin e cuero bruin manera di mi, y mi no kier pa nan deporta mi”, e migrante a señala.
Un Mundial desde cas
José lo sigui e partidonan desde su cas hunto cu su yiu y su amigonan. E tin e speransa cu Mexico lo pasa como prome di su grupo, pasobra si e pasa como di dos, e lo hunga su di cuater partido na Los Angeles. “Esey lo duna mi mas tristesa, tin nan aki y no por bay ni sikiera n’e concentracion”, el a agrega.
E precaucionnan cu e Mexicano aki ta tuma ta bin for di e advertencianan di e defensornan di migrantenan. “Nos ta recomendando pa extrema precaucion, specialmente den e cercania di e stadionnan”, sectornan comunitario a splica, representa pa Francisco Moreno, vocero di e Consejo de Federaciones Mexicanas en Norte América (COFEM).
Den e lunanan cu pasa, mas di 120 organisacion encabesa p’e Union Estadounidense de Libertades Civiles (ACLU), a emiti un alerta advirtiendo cu e fanaticonan, hungadonan, periodistanan y bishitantenan cu motibo di e Mundial por core e riesgo di sufri violacionnan serio di derecho humano, mientras cu e Administracion di e presidente Donald Trump ta intensifica su agenda migratorio.
Jamil Dakwar, director di e programa di derecho humano di ACLU, a critica FIFA fuertemente, sigurando cu e organismo a limita su mes na declaracionnan retorico riba derecho humano mientras e tabata reforsa su lasonan cu Cas Blanco. “Ta ora caba pa FIFA uza su influencia pa impulsa cambionan politico significativo y garantianan vinculante cu ta permiti e personanan sinti nan mes sigur ora nan ta biaha y disfruta di e partidonan”, Dakwar a insisti.
Pero e yamadanan aki no a causa efecto. E secretario di Siguridad Nacional, Markwayne Mullin, no a descarta e operativonan contra sospechosonan di actividadnan delictivo, un situacion similar na esun cu a impulsa e entradanan hudicial den gran ciudadnan democrata manera Los Angeles, lagando miles di persona deteni.
E Mini Mundial y e carchinan contra odio
Merca lo alberga 78 partido di e Mundial den diesun stadion, e mayoria ubica den ciudadnan cu un concentracion halto di migrantenan y di origen Latino Americano, kendenan ta aporta un bon parti di e fanaticada.
N’e veto implicito na e indocumentadonan imponi pa e Gobierno, e organisacionnan comunitario a responde cu varios campaña pa rescata e sentimento di fraternidad cu e encuentro di futbol aki ta lanta. Por ehempel, COFEM a celebra na Los Angeles un campeonato entre ekiponan di mucha cu tabata representa 16 di e paisnan clasifica. “Esaki ta un ehempel di convivencia, cu nos por bisti e jersey pa e otro”, Moreno a comenta.
Di otro banda, e Coalición por los Derechos Humanos de los Inmigrantes (CHIRLA) a lansa e campaña “Saca e carchi pa Odio”, cu ta busca educa e comunidadnan riba e incidentenan di odio y con pa denuncia nan. E campaña, cu tin e apoyo di e ciudad di Los Angeles, ta implementa carchian cora y geel, mescos cu esnan cu ta uza den futbol, pa anima e publico pa condena incidentenan cu, maske nan no ta yega na ta crimen di odio, ta perpetua e discriminacion y racismo.
