Lider di fraccion di PPA, Eduard Pieters, a declara cu e reciente consehonan di Raad van Advies y Raad van State a confirma loke PPA a bin ta adverti for di principio: articulo 38 di Rijkswet HOFA no ta bon den su forma actual.
“Un biaha mas PPA ta haya rason,” Pieters a expresa despues di e reunionnan na Hulanda. “Tanto Raad van Advies como Raad van State ta yega na e mesun conclusion: articulo 38, manera cu e ta formula aworaki, no ta bon y mester cambi’e.”
Dos institucion constitucional, un mesun señal
Segun Pieters, Raad van Advies tabata cla cu e formulacion actual mester modifica profundamente. Awor Raad van State tambe a yega na e conclusion cu e articulo mester ta reescribi y limita. Particularmente, Raad van State a recomenda pa concentra articulo 38 exclusivamente riba e cuantificacion di e normanan financiero stipula den e Landsverordening Waarborging Houdbare Overheidsfinanciën (LWHO). “Esey ta un cambio fundamental,” Pieters a enfatisa. “Ora dos Hoge Colleges van Staat ta bisa cu e articulo mester wordo cambia, e ta nifica simplemente cu e texto actual no ta funciona.”
AVP tambe ta reconoce e problema
Loke ta mas significativo politicamente, segun Pieters, ta cu despues di e reunion cu Raad van State, e lider di fraccion di AVP a declara publicamente cu gobierno mester renegocia cu Hulanda y mester renogocia e contenido di e Rijkswet HOFA segun e conseho di Raad van State. Ademas e lider di fraccion di AVP a expresa cu Parlamento di Aruba tambe mester analisa e puntonan aki na beneficio di Aruba.
“Esey ta importante,” Pieters a declara. “Paso awor no ta solamente PPA ta bisa cu e leynan aki no ta bon den e forma con e ta awo, sino awor tin reconocimento for di otro banda tambe.
PPA ta sigui trece solucionnan
Pieters a enfatisa cu PPA no ta limita su mes na critica so. “Nos no ta solamente señala problema. Nos ta trece alternativa y e solucionnan. Si e meta ta garantisa finansa sano, nos por logra e mesun meta ey sin viola nos Constitucion of crea conflicto cu nos autonomia.”
Segun PPA, e dos consehonan cu awor tin riba mesa ta mustra cu e caminda actual no por sigui manera e ta. “E pregunta awor no ta si articulo 38 tin problema. E pregunta ta con nos lo coregi e problema aki, respetando nos Estado di Derecho, nos autonomia y nos Constitucion.”
