Crisisteam no ta integro;
DVG y Crisisteam gara ta falsifica y manipula cu reglanan di entiero.
Den e mas reciente debate publico riba maneho di entiero, unda Gobierno y Crisisteam ta hiba di gusto pa trata famianan manera cacho, kitando nan derecho di despedi di nan ser keri, a bin constata konkelmento y falsificacion, unda Crisisteam, contra tur regla, pa purba scapa nan pejeho, ta ocuri na manipulacion y falsificacion di nan propio reglanan. Esaki no ta algo integro y pues nan ta hasiendo nan mes culpabel di e delito di falsificacion, pasobra eventualmente “barbertje moet hangen”.
// Protocol di 18 di September ta scondi
Ademas di no ta integro, nan falta transparencia, pasobra nan a ganja pueblo cu e protocol di 18 di September 2020 ta poni riba nan website, siendo esey ta mentira. Ni riba website di DVG, ni riba di CovidAruba por a haya e protocol di 18 di september 2020!
/// Protocol ta clasifica “concept”, pues ta un draft
Despues di hasi varios buskeda pa e protocol, via via SOLO a logra haya un copia. E protocol ta contene un total di 7 regla. E prome cos cu a hala atencion te hecho cu e protocol ta clasifica como “concept”. Pues e no ta clasifica como “definitivo ” of “aproba” y no por a saca afor si e ta oficial.
/// DVG y Crisisteam gara ta manipula y falsifica punto # 2 di nan propio Protocol di 18 September 2020
Ora a repasa e protocol di 18 di September 2020, a bin descubri cu Crisistram a hasi manipulacion y falsificacion cu punto # 2. Den punto 2, ta poni esaki:
*2. GEEN CONDOLEANCES THUIS* pa cual ora nan traducie’le na papiamento, nan a skirbi full un otro cos.
Si traduci “geen condoleances thuis”, na papiamento, e ta bisa cu “no ta permiti bishita di condolencia na cas.” Kico ta bishita di condolencia? Esey ta ora cu bo hasi un invitacion na publico pa e acto di condolencia, unda publico ta bishita pa duna condolencia.
// Crisisteam a falsifica e regla den traduccion na papiamento y Hulandes;
Crisisteam na un manera hopi cuestionabel (sin integridad) a traduci e punto 2, cambiando totalmente e contexto, pone full un otro regla, den nan anuncio di dia 3 di maart, referiendo na e protocol di 18 di September y a pone esaki:
“No por hiba e fayesido cas pa tuma despedida”..
Mas pior ainda; den e comunicado na Hulandes, poni riba website di DVG, nan a cambia e text na Hulandes y pone:
2. “De kist met de overledene is thuis niet toegestaan”
*FALSIFICACION, MANIPULACION, AMATEURISMO Y CERO INTEGRIDAD: *
Hasi un traduccion di e protocol y dune full un otro contexto den papiamento y Hulandes, ta valsheid in geschrifte y dificilmente nos por kere cu esaki por ta trata di un error humano. Aki tanto DVG y Crisisteam a mustra cu nan no ta di confia. Nan ta manipulador, y kier hunga cu regla na nan antoho.
E hecho cu no ta permiti bishita di condolencia na cas, hamas ta mescos cu no por hiba e fayecido cas pa famia tuma despedida. Esey ta algo totalmente diferente!
Con ta posibel? Y ken a permiti pa e protocol di 18 di Sep wordo falsifica ? Y treci dia 3 di Maart, den un version falsifica di e berdad ? Ken a konkel cu e regla ? Dicon ? Cu ki meta ? Pa busca coûte que coûte pa haya culpabel? Ken ta esnan cu a conspira pa haci e cambio aki, contra tur principio di integridad ? Y ki paso ta bay tuma contra esnan cu a hasi e falsificacion aki ? Lo just laganan sigui traha?
Mas cu claro esaki ta confirma cu nan ta “burachi di poder” y ta busca tur forma pa sigui nan draaiboek cu ta wordo traha pa un agencia funeral cu a abusa di famianan, inpidiendo pa despedi di sernan keri.
Casi sigur cu despues di e informe aki, Crisisteam lo mantene silencio, y lo no kier duna comentario. Nan silencio ta confirma cu nan a actua corupto, sin integridad y den forma intencional kier cambia contexto y nan kier faborece e funeraria na Cumana.
Mas peor ainda, cu e hendenan aki ta hinca mandatarionan tambe den e baina aki, pasobra ta sigui otro cartanan, na unda por lo menos un mandatario tambe ta bay ciegamente tras di e manipulacion aki, unda por tin consequencia legal.
Cu e manipulacionnan aki di regla, konkelmente, sjoemel, ken por tin confiansa den Crisisteam y DVG? Ta ken ta investiga nan? Nan cu nan mes ? Na 2021 no tin espacio pa triki cu trampa! Mas cu claro e intregridad di Crisisteam a bira cero! Y mas tristo ta cu nan ta prefera di keda keto pa asina nan mes confirma e falsificacion cu nan a haci. Cu nan silencio nan ta confirma! Wie zwijgt, stemt toe!
