Proyecto di verf cas ta fortalece orguyo, sentido di comunitarismo y ta contribui na un experiencia mas bunita pa residente y bishitante. Diasabra mainta un biaha mas, hunto cu varios boluntario, Prome Minister mr. Mike Eman a pasa verf cas na San Nicolas. E proyecto di verf casnan di Bernhardstraat ta sigui avansa cu entusiasmo, sentido di e bon comun y un gran deseo pa haci un diferencia den nos comunidad. Na Bernhardstraat 141, cas di Glenda Croes-Cheong y Ming Cheong e boluntarionan a zorg pa e cas haya un aspecto nobo danki na e esfuerso di esnan cu a uni nan mes na e iniciativa. E accion ta forma parti di e esfuerso continuo pa revitalisa Bernhardstraat y fortalece e orguyo di biba den San Nicolas.
No tur cos ta placa
Purcy Wirht di Ba-We Construction & Cleaning a participa activamente hunto cu su ekipo. E motivacion principal ta e amor pa Aruba y e deseo pa contribui na un isla mas bunita y limpi. “Mi kier cu Aruba ta bunita. Gobierno ta yudando nos pa haci Aruba mas bunita y ami tambe kier aporta mi parti. Mi ta aki awe pa yuda Aruba sigui bunita y limpi.” Purcy a splica cu su compania no a duda pa participa y cu nan ta dispuesto pa brinda apoyo unda cu ta necesario. “Mi ta aki cu mi compania completo. Nos ta cuminsa limpi, organisa y yuda den tur loke ta necesario. Esaki no ta solamente pa Bernhardstraat. Esaki ta pa Aruba.” El a haci un yamada na otro comerciante chikito y ciudadano pa tambe aporta na nan comunidad. “Mi kier invita otro empresanan chikito y persona cu tin un negoshi pa uni nan mes. Nos mester hacie hunto. No tur cos den bida ta pa placa. Ora bo haci algo pa bo comunidad, bo ta sinti bo mes satisfecho. Bo ta sinti alegria. Esaki ta e balor di haci trabou boluntario.”
Bernhardstraat tin importancia turistico
Glenda Thomasia di Ministerio di Asunto General a expresa su gratitud pa tur esnan cu a ofrece nan tempo, material y esfuerso pa e proyecto. “Nos a haya hopi hende dispuesto pa yuda. Ora nos pidi ayudo, hopi persona a bin cu un man habri pa yuda. Tin hende cu a duna verf, otro cu a duna cuashi y tin boluntario cu simplemente a ofrece nan tempo. Tur aporte ta aprecia.” Segun Thomasia, Bernhardstraat tin un importancia special pa San Nicolas y pa Aruba como pais turistico. “Nos ta un pais turistico y Bernhardstraat ta un caminda importante. Nos kier cu ora bishitantenan yega Aruba, nan por mira e color, sinti e energia y experimenta e vibra unico di nos isla.” El a conta cu durante un bishita reciente na otro isla den Caribe, el a realisa cu e ambiente y aspecto di un comunidad tin gran influencia riba e experiencia di un bishitante. “Ora bo yega un isla, bo kier mira y sinti e emocion di e isla. Bo kier mira color, bida y un comunidad cu ta cuida su mes. Esaki ta exactamente loke nos ta trahando pa logra na Bernhardstraat.” Thomasia a enfatisa cu hopi residente a warda hopi tempo pa por duna nan cas un aspecto nobo, pero e costo di mantencion y verf ta representa un reto pa diferente famia. “Hopi biaha hende kier verf nan cas pero nan no por. Solamente verf un cas por costa miles di florin. Tin famianan cu a warda hopi aña pa por haci esey. Esey ta haci cu e apoyo di e boluntarionan y comerciante ta algo hopi special.” Segun Thomasia, e proyecto no ta solamente cambia e apariencia di un cas, sino tambe e sentimento di e residente. “Nos kier cu ora un persona yega su cas, e por sinti orguyo. Cu e por mira su cas y bisa: esaki ta mi hogar.”
Trabou tin pa varios fin di siman en adelante
Prome Minister Mike Eman a destaca e gran participacion di ciudadano y e espirito di boluntarismo cu a caracterisa e accion. “Aruba ta nos tur. Cada un di nos cu sinti e yamada pa contribui na limpiesa y mantencion di nos comunidad por haci un diferencia.” Segun Prome Minister Eman, gobierno kier sigui stimula empresa, e asociacionnan y e fundacionnan adopta un cas of mas cas pa brinda apoyo na e famianan cu tin mas necesidad. “Nos ta haci un empuhe pa e empresanan y organisacionnan bay adopta un cas of mas cas. Si nos traha hunto, nos por haci Aruba mas bunita y mehora e calidad di bida di nos ciudadano.” E Prome Minister a recuerda cu e proyecto a cuminsa siman pasa cu cas di famia Vorst y cu e trabou lo sigui durante e siguiente simannan. “Siman pasa nos a verf cas di famia Vorst. Awe nos ta na cas di famia Cheong. Y nos ta sigui. Otro weekend nos lo cuminsa cu dos otro cas mas, directamente despues di e pompstation. Ta dos cas tipico di Aruba y di San Nicolas, cu color pastel y un caracter Caribense cu lo duna mas bida na Bernhardstraat.” Segun Mike Eman, e vision ta pa crea un bario cu color, bida y speransa. “Nos kier cu ora bo pasa Bernhardstraat, bo mira un bida nobo. Bo mira color, alegria y un comunidad cu ta biba. Esaki ta importante pa e animo di nos pueblo y pa e imagen di nos pais.”
E respuesta positivo cu e iniciativa ta ricibi ta confirma cu ora gobierno, empresa y comunidad ta traha hunto, accion concreto por transforma no solamente un cas, sino tambe fortalece orguyo, sentido di bon comun y calidad di bida den nos barionan.
