Un situacion hopi lamento y di sin respet total a tuma luga patras di Pius X School na Dakota, caminda tin Kapel di San Gregorio Hernandez, a bolbe bira bictima di vandalismo y den bentamento di sushi. E acto aki a lanta un gran indignacion y rabia den e comunidad local, specialmente cerca esnan cu ta dedica nan tempo boluntario pa cuida y mantene e Cas di Oracion aki limpi y den un estado digno pa tur e fielnan.
Segun e relato di e personanan encarga cu e mantencion, ta un dolor grandi pa bishita e sitio sagrado aki y topa cu e desaster cu otronan di mala fe ta laga atras. E boluntarionan ta haci un esfuerso diario pa percura p’e lugar keda aceptabel pa e bishitantenan cu ta bin busca consuelo y haci nan oracionnan, pero e falta di respet di algun ciudadano ta keda kibra e trankilidad di e zona aki.
Aña aden y aña afo, e personanan aki ta wordo confronta cu e situacion fastioso di topa cu sushi di tur tipo benta rond di e kapel, un hecho cu no solamente ta duna un mal bista contra salubridad publico, sino cu ta haci mofa di un espacio cu ta destina pa la fe y devocion religioso. E boluntarionan, cansa di e sushi y e bisiñanan iresponsabel, ta lansa un grito di auxilio pa stop e vandalismo aki.
Pa e motibo aki, ta haci un apelacion publico y directo na cualkier instancia, compania privá of fundacion cu por duna un man. E necesidad primordial den e momentonan aki ta pa haya un sistema di luz cu ta traha cu solar panel (luz solar). Cu un bon iluminacion den e area exterior, lo por combati e scuridad cu e malhechornan ta uza pa comete nan actonan y benta sushi ilegalmente patras di e scol.
Señor lo bendiciona tur e personanan of instancianan cu por bin pa yuda soluciona e fayo structural aki di siguridad. Ta pidi e comunidad di Dakota y e pueblo en general pa tene mas consenshi y respet pa nos casnan di oracion, percurando pa cuida e Kapel di San Gregorio Hernandez cu ta un patrimonio di fe pa hopi hogar riba nos isla.
