Fraccion di MEP a manda un carta fuerte na Presidente di Parlamento exigiendo claridad inmediato riba e continuacion di e reunion publico cu a cuminsa dia 11 di mei 2026 tocante e decision di Ministerio di Enseñansa pa otorga varios encargo sin proceso regular di destaho.
E reunion a wordo yama pa trata un asunto di importancia, despues cu diferente medio di prensa a publica cu Minister Gerlien Croes a haci uso varios biaha di excepcionnan den otorgacion di encargo financiando cu placa publico, sin duna cuenta. Despues di e prome tanda di debate, e reunion a wordo suspendi y te ainda no tin ningun indicacion ki tempo e lo wordo continua.
Lamentablemente, mientras cu e reunion aki ta keda para, otro reunionnan di Parlamento si a wordo yama y trata. Esaki ta crea un impresion preocupante cu tin un sistema di “pick and choose”, unda ministernan ta selecta pa cua asunto nan ta dispuesto di duna cuenta y splicacion, y cua asunto nan por keda sin duna cuenta.
Parlamento no por acepta un situacion unda un reunion publico oficialmente yama pa eherce e funcion di control ta keda suspendi pa lunanan sin ningun splicacion. Esaki no solamente ta falta di respet pa Parlamento, pero tambe pa pueblo cu ta en espera di transparencia y dunamento di cuenta di su gobernantenan, specialmente esnan cu a priminti un politica “nobo”.
E caso ta mas remarcabel ainda mirando cu e minister responsabel, Gerlien Croes, den su tempo como miembro di Parlamento, tabata hopi critico riba uso di excepcionnan similar y tabata exigiendo transparencia completo di otro ministernan. E mesun criterio mester aplica awor cu e ta ocupa un cargo ministerial.
Den e carta di Fraccion di MEP a pidi pa informa ki dia Parlamento por spera cu e debate lo sigui.
Ademas, un copia di e carta a wordo manda pa Gobernador di Aruba. No pa involucra e Gobernador den un debate politico, sino pasobra e asunto aki ta toca directamente e bon funcionamento di nos democracia parlamentario y e capacidad di Parlamento pa eherce su tarea constitucional di control riba gobierno.
Respet pa Parlamento no ta un fabor cu gobierno ta duna. Ta un obligacion fundamental den cualkier democracia serio. Pueblo di Aruba tin derecho di haña contesta, y Parlamento tin derecho di exigi nan.
