Den un ambiente festivo yen di amistad, cooperacion y orguyo Caribense, Aruba y Corsou a celebra un paso importante den nan relacion historico cu motivo di e reciente firma di un Memorandum of Understanding (MOU) enfoca riba turismo, conectividad, siguridad den turismo y desaroyo sostenibel.
E evento special a reuni representantenan gubernamental, actor principalnan den industria di turismo y invitadonan pa conmemora e relacion cada biaha mas fuerte entre e dos islanan ruman, uni pa historia comparti, cultura y un bision comun pa futuro.
E anochi a cuminsa cu palabranan di bonbini di CEO di Aruba Ports Authority (APA), Marc Figaroa, sigui pa discurso di Presidente di Parlamento, Marlon Sneek, y Lider di Fraccion AVP, Jennifer Arends-Reyes, Minister di Turismo, Transporte y Labor, Wendrick Cicilia y Minister di Desaroyo Economico di Corsou, Roderick Middelhof. Durante nan discurso, nan a destaca e importancia di cooperacion regional, conectividad entre e islanan y e balor di sigui construi riba e relacion special cu Aruba y Corsou a comparti pa generacionnan.
E reciente Memorandum of Understanding entre Aruba y Corsou ta marca un compromiso comparti pa fortalece cooperacion den area manera turismo, conectividad aereo y maritimo, promocion turistico, siguridad den turismo, sostenibilidad, intercambio di conocemento y desaroyo economico.
Un di e momentonan mas memorabel di e anochi tabata e espectacular presentacion di videomapping dedica na Corsou y su participacion den Mundial FIFA. Proyecta riba e tanki di APA, e experiencia visual a ilumina e anochi cu imagennan y simbolonan cu a honra e logro historico di nos isla ruman riba escenario mundial.
E presentacion no solamente a celebra futbol, pero tambe e orguyo, perseverancia y e union cu Aruba y Corsou ta comparti como dos islanan cu lasonan profundo den Caribe.
Minister Wendrick Cicilia a enfatisa e importancia di sigui traha hunto pa crea oportunidadnan nobo pa ambos isla.
“Aruba y Corsou ta comparti hopi mas cu proximidad geografico. Nos ta comparti historia, cultura, amistad y un compromiso pa sigui move nos pueblonan dilanti. E cooperacion aki ta representa e conviccion cu ora nos traha hunto, nos ta mas fuerte y nos por logra mas pa nos comunidadnan.”
E anochi a termina cu un mensahe di union y colaboracion, resaltando cu a pesar di tur dos isla tin nan propio identidad unico, tin hopi oportunidad pa sigui traha hunto pa beneficia nos region y nos pueblonan.
